"Incubus"

Gula 128

Matag gabii, dili gayod mosipyat nga mosulod si Bradley sa lawak nga akong nahimutangan diin gigaid ko niya sa lantay. Tangtangon lang niya ang akong mga gapos kun motubag ko sa call of nature. Apan mabinantayon kaayo si Bradley. Wala gyud ko niya hatagi’g higayon nga makalingla niya aron makaikyas.

Matag sulod ni Bradley sa lawak nga iyang gibutangan nako, iyang pahimuslan ang akong pagka babaye. Subli-sublion niya sa makadaghan ang pag-angkon kanako aron pagtagbaw sa iyang kailibgon ug kahangol. Ug molampos siya sa dakong kasayon kay ginapos man lagi ko. Sa higayon nga angkonon niya ang akong pagka babaye, mora ko’g gisilotan gumikan sa bation kong hilabihan nga kakatol.

Sa gibuhat ni Bradley kanako sa makadaghan, misamot ang gibati kong kasilag ngadto kaniya. Dili ko siya mapasaylo sa iyang gihimo. Ako mismo ang mangunay sa pagpatay kaniya kun makalingkawas ko sa akong kahimtang. Sobra na ang iyang pagpanamastamas sa akong pagka babaye. Miawas na kini sa gantangan sa akong pailob!

Unya, nakahunahuna ko kang Dirk. Nakaseguro kong wala mohunong si Dirk sa pagpangita nako. Apan hangtod karon wala pa gihapon siya ug ang mga kauban niyang polis makaabot sa akong nahimutangan. Nag-ampo ko nga matultolan na unta nila ni Dirk ang dapit nga gidad-an ni Bradley nako aron makalingkawas na ko sa pait nga kahimtang. Gihimo kong sex slave sa tawong gisudlan sa incubus.

Usa ka higayon niana, milakaw si Bradley. Gibiyaan ko niyang nag-inusara sa karaang balay nga nahimutangan sa awaaw nga dapit. Gipahimuslan ko ang higayon. Nangita ko’g paagi nga maputol ang pisi nga gigapos kanako. Gibag-id-bag-id ko kini sa ngilit sa lantay sa tuyo nga maputol kini. Apan napakyas ko.

Unya, nakugang ko dihang nakadungog ko’g lagubo didto sa gawas. Mora bag may tawo nga misulod didto sa sala. Wala ko maglihok. Nagtuo kong si Bradley ang nahiabot. Unya nakasinggit ko dihang morag gitindakan ang pultahan sa lawak nga akong nahimutangan. Apan kalit lang kong mibatig kahinangop pagkakita sa tawo nga misulod. Si Dirk! -- Sumpayan pa