"Incubus"

Gula 126

Nalingla gyud ko ni Bradley. Karon pa nako matugkad nga iya lang diay kong gilansisan nga dad-on ko niya sa nahimutangan ni Dirk aron dili ko maglangas samtang nagsakay mi sa owner-type jeep sa akong bana.

Ang nanuslok sa akong kaisipan kun nganong si Bradley na man ang nagmaneho sa sakyanan ni Dirk. Iya kahang gi-carnap ang maong sakyanan? Kun mao, posibleng gipangita na karon ni Dirk ang sakyanan. Ug may paglaom pa nga makalingkawas ko gikan sa mga kamot ni Bradley. Apan kinahanglang magdali si Dirk samtang wala pa maghimog daotan si Bradley nako. Nasayod kong daotan gayod og tuyo si Bradley nako.

Mibagting ang cellphone nga akong gisulod sa akong shoulder bag. Kay gigapos man ko, si Bradley ang mitubag sa tawag. Sa akong paminaw, morag si Dirk ang nanawag. Nagsusi tingali kini kun hain ko.

“Dia sa akong mga kamot si Ingrid, Dirk,” matud ni Bradley.

“T-tabangi ko, Dirk!” Misinggit ko aron makadungog ang akong bana sa akong tingog. “Tabanggggg...!”

Giputol ni Bradley ang panagsulti nila ni Dirk sa cellphone. Unya mipaduol siya’g maayo nako. Iyang gihapuhap ang akong aping. Gilud-an ko siya.

“Save your energy, Ingrid,” giingnan ko niya. “May session ra ba ta unya.”

Migawas si Bradley sa lawak nga akong nahimutangan. Dihang ako na lang usa sa lawak, nangita ko’g paagi nga makalingkawas sa akong kahimtang. Gusto kong mabadbad ang pisi nga gigapos sa akong mga kamot ug tiil.

Apan napakyas ko pagtangtang sa akong gapos. Hugot kaayo ang pagkabaat sa pisi sa akong kamot ug tiil. Lig-on sab kaayo ang pisi.

Paglabay sa pipila ka gutlo, mibalik pagsulod si Bradley sa lawak nga akong nahimutangan. Miduol dayon siya nako. Lain kaayo siya’g tinan-awan. Unya, ginamit ang bowie knife, gipanastas niya ang tanang mga salimbong sa akong lawas. Wala ko makahimo pagsanta kaniya kay ginapos man ko. -- Sumpayan pa