Ungo nga wa'y mga ngipon

Unsa si Osting ungo? Di ko motuo, uy, nagpahiyom si Kolas nga mitubag sa gitaho kaniya ni Doming. Suod silang higala si Doming ug dinhi sa ilang baryo sila gyud ang pinaka suod nga managhigala.

Bisag asa sila mangabot sila gyud kanunay ang magkuyog ug sa dihang duna na sila’y tagsatagsa ka kabilinggan kay pulos na man sila dunay pamilya, panagsa na sila magkuyog pero kun magkabagat sila di gyud ikalimod nga suod lang gihapon sila.

Dinhi sa ilang balangay sa Uwak may gipatay. Napalgan kini sa may tampi sa sapa. Matud gipaak kuno sa bitin ug may nag-ingon usab nga gipaak sa buaya ug bisag unsa na lay ipasangil sa namatay nga babaye. Pero si Kolas nagtuo gyud nga balbal ang namatyan sa babaye nga motubag sa pangalan nga Daria.

Si Daria mamalitay og botelya ug kay nagabhian man didto sa may sapa maong giatngan sa mangtas nga ungo ug gibalbal. Tiaw mo bay hasta tinai ug atay ug kasingkasing gikuha sa ungo.

“Aw, kun di ka motuo nako, bay Kolas, naa ra nimo,” ni Doming pa nga ingon sa mihilom pagkalit. Wala na siya makigsulti kang Kolas.

“Ayaw lang og kasuko, ha, bay, kuan man god, wala man nay ngipon si Osting kay sukad masakit og pyorya, nahurot ang tanan niyang mga ngipon pagka huslo ug pagkadugta,” pasabot ni Kolas.

“O, lagi, pero, basig nalimot ka nga ang iyang apohan nga si Hugo puwerteng mangtasa didto sa Tal-ot,” ni Doming pa.

“O, sige, aron gyud atong matino kun tinuod ba ang imong pagduda bahin kang Osting, ato siyang panid-an. Bisag asa siya ato siyang sundan,” ni Kolas pa nga mipahayag sa iyang higala.

Tuod, gibuhat dayon nila ni Kolas ug Doming ang pagpaniid sa pagkatawo ni Osting. Si Osting nag-inusara na lang sa iyang payag. Sukad mamatay ang iyang mga ginikanan nga usa ka misteryo nga kamatayon ingon sa wala na pod ganahi si Osting sa pagpangita’g iyang ikauban sa iyang pag-inusara.

Ulitawo siya ug ang iyang panginabuhi mao lang intawon ang pagpanakag lubi ug kun way mosugo kaniya sa pagpanakag lubi moadto siya sa dagat aron managat. Ang iyang mga kuha igo ra pod niya, kay ang uban iya mang ibaligya ug ang nahabilin maoy iyang konsumo.

Ug mao nga matag gabii ug matag adlaw naniid sila si Kolas ug Doming kang Osting. Usa ka gabii nga wala si Osting sa iyang payag, gisusi dayon nila ni Kolas ug Doming kon unsa gyu’y naa sa payag ni Osting. Tuod man, nakugang sila kay dihang ilang giukban ang usa ka gipadaplin nga banga, diha may mga kamot ug tiil sa tawo nga hapit na mahimabaw sa banga ang gidaghanon.

“Sus, Bay, ungo gyud, ungo gyud si Osting!” mitaas ang tingog ni Doming. “Unsa na, bay Kolas, tuo ka na gyud ron...”

Nianang pagka sunod gabii, ilang gihup-an ug gipanid-an si Osting sa iyang balay. Mingaw karon ang payag ug ang buwan misubang na. Nagpaduol sila si Kolas ug Doming ug mao gyu’y ilang nakita si Osting nga nahimong usa ka dakong iro ug nakita pa gani nila nga labihan nang tag-asa sa mga ngipon niini. Gisundan nila ang dakong iro kun asa paingon. Didto kini mopaingon sa balay nilang Doming.

“Uy, tua mopaingon sa among balay ang mangtas. Di ni mahimo kinahanglan nga mapatay ko ang mangtas nga si Osting!” Nagpangagot ang mga ngipon ni Doming sa kalagot. Dihang sak-on na sa mangtas nga iro ang balay nila ni Doming. Lima ka lanog nga mga buto sa pistola ang nabati ug miligdas ang dakong iro. Taudtaod miporma ang nawong ni Osting apan ang lawas iro lang gihapon. (Kataposan)