"Incubus"

Gula 122

Mibati ko’g tumang kahibulong. Mao usab si Dirk. Ikaduhang higayon nga nakasaksi kami sa maong hitabo-- ang misteryosong pagkahanaw ni Bradley sulod sa among balay. Sama siya sa tagulilong nga kalit lang nawagtang.

Sa una, wala lang namo hatagi’g gibug-aton ang kalit niyang pagkahanaw dihang pusilon na unta siya ni Dirk samtang nagbuy-od sa hagdanan sa balay. Wala kami panahon pagtuki sa maong hitabo niadtong higayona kay mao may nasentro sa among pagtagad ang pagpanamastamas ni Bradley nako samtang natulog ko.

Apan karon, nakahatag na gyud og tanghaga sa among hunahuna ang among nasaksihan. Nganong kalit man lang nahanaw si Bradley nga ingon sa gitangag sa hangin? Niini, mibati ko’g kabalaka. Sa tan-aw ra ba nako ni Bradley kaganina, daw sama siya sa usa ka demonyo. Duna kahay anting-anting si Bradley?

Naputol ang akong pagpamalandong dihang may sakyanan nga mihunong sa tungod sa gate sa balay. Nadungog namo ang lanog nga pagbosina. Midali si Dirk pagkanaog sa silong. Gisundan ko siya nga migawas sa balay aron pagsusi kun kinsay nahiabot. Nagbitbit si Dirk sa iyang armas.

Si Prof. Feder Vercelli diay ang sakay sa sakyanan nga mihunong sa atubangan sa gate sa among balay. Giablihan dayon ni Dirk ang gate aron makasulod ang sakyanan sa psychic. Dihang nakaparada na ang gisakyan niini, nanaog dayon si Prof. Vercelli. Misulod ming tulo sa balay.

“Nganong mianhi ka man, Prof. Vercelli,” si Dirk ang nangusisa,“niining orasa sa kagabhion?”

“Tungod kay dili na ko makapaabot sa kabuntagon, Mr. Salcano,” matud sa psychic nga ligdong kaayong namulong. “Kinahanglang masayod kamo sa resulta sa akong pagmonitor sa incubus aron makapangandam kamo sa iyang pag-atake.”

“Kay ngano man diay, Professor?” Akoy nangutana. “Unsa man diay bag-ong kasayoran nga imong nakuha mahitungod sa incubus?” -- Sumpayan pa