"Incubus"

Gula 121

Mitimbakuwas pagbangon si Dirk. Mibangon sab ko. Nagpadayon sa pagtay-og ang linog nga dili kaayo kusog. Ingon sa mikurog ang balay nga natay-og. Dihay mga butang sulod sa among kuwarto nga nangahulog ngadto sa salog.

Pagkilab sa pipila ka daklit, kalit lang naabli ang pultahan sa among lawak. Nakasiyagit ko sa kalisang. Migakos ko’g maayo ni Dirk. Iya kong gipakalma. Iya kong gialam-alaman nga dili angay mahadlok.

Unya nakita namo nga mihinay pagsulod sa lawak ang bayhon sa usa ka tawo. Nakugang kami si Dirk dihang nailhan na namo ang maong tawo. Si Bradley.

“Kumosta ang mga higala kong magtiayon?” Gikan ni Bradley samtang inanay nga milakang paduol sa among nahimutangan.

“Nganong nia ka, Bradley?” Si Dirk ang nangutana. “Nganong nangahas ka pagsulod ning among panima’y ning orasa sa kagabhion? Usa ikaw ka intruder.”

“I come for my wife,” matud ni Bradley nga ako maoy gitudlo. “Ingrid, come to me. Palay-i kanang tawong inutil.”

“Shit!” Nagpaminti sa kalagot si Dirk.

“Nabuang ka na gyud, Bradley,” matud ko nga masuk-anon. “Wa kay katungod sa pag-angkon nga imo kong asawa. Si Dirk ang akong bana ug dili ikaw.”

“Pero naangkon ko na ang imong pagka babaye, Ingrid, ug si Dirk mismo nakasaksi sa maong hitabo.’

Si Dirk ingon sa napikal pag-ayo sa sinultihan ni Bradley nga may sambog nga pagbugalbugal. Kilatnon nga milihok ang akong bana. Gikuha niya ang armas nga gipailadman sa unlan ug gipusil sa makadaghan si Bradley. Naigo si Bradley sa lainlaing parte sa iyang lawas. Mihagsa kini sa salog nga naglunang sa dugo.

Gigakos ko si Dirk. Migakos usab si Dirk nako. Apan nakugang kami sa among paglingi. Wala na didto sa salog nga nahagsaan ni Bradley ang iyang lawas nga nagkadugo. -- Sumpayan pa