Dili motuo ang gugma sa tinuohan

Usa ka trabahante sa konstruksiyon si Raul didto sa dakbayan sa Iligan. Buotan si Raul sa iyang mga higala. Dali siyang suguon sa iyang agalon nga usa ka Muslim ug kining agalon nga Muslim dili sama sa uban nga patay lunod gayod sa iyang pagka Muslim. Ang iyang agalon, nganlan lang nato nga usa ka Amer Dihad nga usa ka Enhenyero.

Gisaligan si Raul sa iyang agalon ug siya ang kanunay suguon para mamalit sa mga materyales nga iyang gamiton para sa konstruksiyon sama sa semento, kabelya ug uban pa.

Naay anak si Amer nga Sarah ang ngalan. Maanyag si Sarah tungod sa trabaho ni Raul, nagkasuod sila. Si Sarah ang gisaligan sa iyang amahan sa ilang negosyo sa tindahan. Usa ka adlaw niana, daw nakamatikod ang amahan nga suod kaayo sila si Raul ug Sarah, tungod niini, nakigsulti ang amahan ngadto sa iyang anak dalaga.

"Sarah, nakamatikod ako morag suod kaayo kamo ni Raul," pulong ni Amer ngadto sa iyang anak. "Maayo ug buotan si Raul. Masaligan siya sa atong negosyo. Apan, ang problema kay managlahi ang tinuohan sa ilaha."

"Pa, kinahanglan nga duna untay balaod nga magtugot sa usa ka babaye ug lalaki nga managhigugmaay," matud ni Sarah. "Kining balaod sa Muslim, daw naghikaw sa duha ka gugma sa Kristiyano ug Muslim."

"Nagpasabot ba kini nga nahigugma ka kang Raul?"

"Wala man, Pa. Pero nakita ko nga si Raul usa ka lalaki nga angay higugmaon."

"Apan, masuko ang atong mga ginikanan kun higugmaon mo siya kay managlahi ang atong tinuohan. Dili kana mahitabo sa atong relihiyon. Ang Kristiyano para sa Kristiyano ug ang Muslim para lang gayod sa Muslim."

"Apan, ngano man lagi Pa nga daghan man kining Muslim nga naminyo og babayeng Kristiyano? Dili ba usa kini ka diskriminasyon? Nganong dili man patas ang pagpadagan sa balaod sa mga Muslim?"

Apan, luyo ning tanan, nahitabo gayod nga nagka higugmaay sila si Raul ug Sarah.

"I love you, Sarah," matud ni Raul. "Unsa man kaha ang mahitabo kun masayran ni Papa mo nga gihigugma ko ikaw."

"Mao bitaw kana ang akong gikabalak-an," matud ni Sarah. "Unsa man kaha ang atong buhaton?"

"Bahala! Basta ang importante mao, nga gihigugma ko ikaw Sarah. Dili ako mahimutang kun mawala ka sa akong kinabuhi."

Unya sa pagsulti niini ni Raul, wala niya kapugngi ang paghalok sa ngabil sa dalaga. Mipasalig si Raul nga dili gayod siya mausab bisan kanus-a. Alang kaniya, wala nay lain pang babaye dinhi sa kalibotan gawas lang kang Sarah.

Nasayran gayod sa mga ginikanan sa duha ang ilang relasyon. Kun ang ginikanan ni Sarah mao ang magbuot, dili siya mosupak nga si Sarah maminyo og   lalaki nga Kristiyano kay dako gayod nga supak kini sa relasiyon nga Muslim. Apan, ang kadaghanan sa mga kadugo niya, dako gayod nga supak.

"Usa lang ang inyong buhaton, Sarah, kun mamugos gayod kamo nga magminyo," pulong sa amahan ni Sarah. "Moadto kamo sa laing dapit aron didto na kamo manimuyo."

"Ang problema, wala may kuwarta si Raul," pulong ni Sarah. "kun moadto kami sa laing dapit, asa mang dapita aron dili makit-an. Dili kaha kami patyon sa mga kadugo mo?"

Mao kini ang dakong problema nila ni Raul ug Sarah. Matud pa sa amahan ni Sarah, kinahanglan nga mangadto sila sa laing dapit, kanang sila ra ang nasayod kay kun makita sila, segurado gayod nga patyon sila.

Tungod kaha sa pagsupak sa kabubut-on sa ilang mga kadugo, nagsakit si Raul. Hangtod nga dili na kini ganahang mokaon. Tingali na problema gayod si Raul kun unsaon nga magkadayon sila kang Sarah nga dili mamiligro ang ilang kinabuhi.

Usa ka sulat ang gipadala ni Raul ngadto kang Sarah kay iyang namatikdan nga sukad masayran sa mga ginikanan ni Sarah ang ilang relasyon, ingon sa dili na siya mahatagan og higayon nga magkita sila. Ania ang sulat.

"Dear Sarah,

Tingali dili na kita magkita pa. Nasayod ako nga supak gayod ang inyong mga kadugo nga magkadayon kita. Wala akoy mahimo kun dili mao ang pagpasensiya. Kun unsa ang nahitabo kanako, hinaot nga dili ka mahikalimot kanako didto sa laing kalibotan.

Salamat na lang nga ang imong amahan, dili unta supak sa atong relasyon apan matud pa, wala siyay mahimo.Raul

Wala kapugngi ang mga luha ni Sarah dihang nabasa niya ang sulat ni Raul. Unsa man ang iyang buhaton para lang nga magkita sila kang Raul? Maayo ang iyang Papa kay dili unta mosupak nga magminyo sila apan, ang tanan sa ilang mga kadugo, dili ug dili gayod mouyon nga magkadayon sila.

Ang gipanghinaot ni Sarah nga unta dunay balaod nga magtugot nga ang Muslim ug Kristiyano magkaminyo ug kining nahitabo sa ilang gugma ni Raul, mahimong sukdanan sa iyang pangandoy alang sa panaghiusa sa Muslim ug Kristiyano. (Kataposan)