'Incubus'

 (Gula 118)

Nahigmata ko gumikan sa strange things nga namatngonan. Sa pagbuka sa akong mga mata, nakasinggit ko sa kahikugang. Maoy akong nakita si Bradley nga nagpatong na sa ibabaw sa hubo kong lawas ug nagpalami-lami sa pagpahimulos sa akong pagka babaye samtang ako natulog. Maayo gani kay nakamata ko.

Si Dirk nahigmata tungod sa kakusog sa akong pagsinggit. Pagkakita niya nga si Bradley mipatong nako, iya kining gipahamtangan sa iyang kusog. Gikulata niya’g maaayo si Bradley. Bisan kuwap ang kahayag sa lampshade nga mao ray naglamdag sa lawak, klaro kaayo nakong nakita nga naigo si Bradley sa lainlaing parte sa iyang lawas sa makusog ug nagpungasing mga kinumo ni Dirk.

Dihang nalukapa na si Bradley, gipugos siya’g pabarog ni Dirk pinaagi sa paggunit sa duha ka bukton niini. Tungod ba kaha sa kalagot sa akong bana sa mapangahason nga lalaki, iya kining gitukmod sa paghandos ngadto sa may pultahan sa kuwarto. Naguba ang pultahan nga nadasmagan ni Bradley ug milahos siya ngadto sa gawas.

Si Dirk ingon sa wala pa matagbaw. Gidali niya’g kuha ang iyang armas aron tiwasan ang intruder nga si Bradley. Buot ko siyang pugngan apan iya kong gisawilik. Migawas siya sa pultahan sa kuwarto aron sundan si Bradley. Misunod sab ko ni Dirk. Nakita ko si Bradley nga nagbuy-od sa may hagdanan. Apan dihang pusilon na unta kini ni Dirk, kalit lang kining nahanaw.

“Imposible,” nakatuaw si Dirk.

“Kalit lang nahanaw si Bradley, Dirk,” matud ko. “Unsa man kahay buot ipasabot niining hitaboa?”

“Si Bradley ba kaha gayod kadtong tawo nga mapangahason?”

“Dili mahitabong masayop ko. Si Bradley gayod kadto. Nakita ko siya dihang...”

“Pero giunsa man niya pagsulod sa atong lawak nga serado man ang tanang mga pultahan sa balay? Ug nganong kalit man lang siyang nawagtang dihang ako na unta siyang pusilon?” – Sumpayan pa