Sukli sa utang

 (Gula 72)

Gihimol gyud nako ang tanan aron makuha ang bata nga akong gisabak. Miinom ko’g tubig nga sinagolan sa mga gamot sa kahoy ug sagbot nga matod pa sa katiguwangan, makapakuha kuno sa gisabak. Pait ug aplod ang lami niini apan ako lang giantos. Ang mahinungdanon alang nako mao nga makuha gyud ang bata gikan sa akong sabakan.

Gawas niini, naghimo sab ko’g physical work nga makapahago sa akong lawas. Himuon ko kini sa higayon nga ako rang usa sa balay. May mga higayon nga mokatkat ko sa bungbong sa among balay ug unya moambak ngadto sa salog sa tuyo nga malaglag ang bata sa akong sabakan. Sa laing higayon, akong tawgon ang bata nga dos anyos nga anak sa among silingan ug payatakyatakan nako kaniya ang akong tiyan.

Gihimo ko kini sulod sa pipila ka adlaw hangtod nga usa ka higayon niana, may dugo nga migawas sa akong buray. Gikuyawan ko. Kuyaw ra ba kuno ning magtalinugo ta! Ako ra rabang usa sa balay niadtong higayona. Apan gumikan sa dako kong tinguha nga makuha ang bata nga akong gisabak, gilig-on ko ang akong kaugalingon.

Mamatay kun mamatay! Mao kini ang gisinggit sa akong hunahuna. Namahala na lang ko. Kun mamatay ko tungod sa akong gibuhat, aw, walay suwerte. Unsaon ta man kun didto ra kutob ang kinabuhi. Ang mahinungdanon gyud alang nako niadtong panahona mao ang pagpapas sa gubin sa akong kinabuhi nga mao ang bata nga akong gisabak.

Maayo gani kay dili kaayo daghan ang dugo nga migawas gikan sa akong lawas. Pero mibati gyud kog diyotay’ng kaluya. Kun dili pa tingali ko kusog og fighting spirit, basin og nakuyapan na ko.

Ang akong mga ginikanan nakamatikod nga ingon sa miluspad ko. Maayo gani kay mituo ra sab sila dayon sa akong alibi sa walay pagpangusisa kun unsa gyu’y nahitabo nako. Kompiyansa ra gyud kaayo ang akong mga ginikanan kansang mga hunahuna atua ra sa ilang negosyo.

Nakuha gyud ang bata nga akong gisabak sa inantigo kong paagi. Mibalik ang katawhay sa akong pagtuon. Wala na koy gikabalak-an kay nawagtang na man ang gubin sa akong kinabuhi.

Pag-abot sa adlaw’ng Sabado, nagkita mi si Darwin. Gisuginlan ko na siya sa akong gibuhat-- nga nagsabak ko ug gi-abort ko kini’g unay. Pagkasayod ni Darwin sa akong gibuhat, labihan niyang sukoa. – Sumpayan pa