Sukli sa utang

Gula 71

Gibati ko ang tumang kabalaka. Misantop sa akong hunahuna nga tingalig nagsabak ko. Nagbunga gyud tingali ang gibuhat namo ni Darwin sa makadaghan. Nahasol ko pag-ayo sa akong kahimtang.

Aron masuta kun nagsabak ba gyud ko, nakahukom kong magpahiling sa usa ka doktor. Tuod man, usa ka adlaw niana wala ko mosulod sa akong klase. Mihinok kog pakigkita sa usa ka doktor nga may private clinic sa downtown area sa dakbayan sa Iriga.

Ug wala gyud ko masayop sa akong pangagpas. Nasuta sa doktor nga naghiling nako nga two months pregnant na ko. Nahugno ko sa maong kasayoran imbes nga angay unta kong malipay. Dili pa man god ko ready nga magmabdos. Wala pa ko mangandoy nga makabaton og anak. Gawas pa, seguradong masuko ang akong mga ginikanan sa higayon nga masayod sila sa akong kahimtang. Malintian gyud ko ining kahimtanga!

Paggawas nako sa klinika, daw wala ko sa hustong panghunahuna samtang naglakaw subay sa aseras. Wala ko masayod kun unsay angay kong buhaton karon nga ako nang nasayran nga may kinabuhi nang nagpitik sa akong sabakan. Maglisod kog dawat sa maong kamatuoran.

Ang unang misantop sa akong hunahuna mao nga dili nako pahibaloon si Darwin nga nagsabak ko. Ako man god nga namatikdan nga morag okey lang niya kun momabdos ko kay iya man kuno kong pangasaw-on. Dili man kuno siya motalikod sa iyang kaakohan nako kun magbunga ang among gibuhat.

Ang ikaduhang plano nga akong nahukman nga buhaton mao ang pagkuha sa bata nga akong gisabak. Aborsiyon! Alang nako, dili angay mahimugso ang bata nga gihambin karon sa akong sabakan. Gubin kini sa akong kinabuhi. Sagabal sa akong mga plano. Busa kinahanglang malaglag ang maong bata sa dili pa masayran ang akong pagmabdos sa akong mga ginikanan.

Tibuok adlaw nga wala ko mosulod sa akong mga klase. Mipauli ko sa balay. Naghunahuna ko kun unsay angay kong buhaton aron makuha ang bata gikan sa akong sabakan. Nakahunahuna kong pangunayan paglaglag ang bata nga akong gisabak. Nagreserba man god kog kabalaka nga tingalig mabulgar nga nagpakuha ko sa akong gisabak kun modangop ko sa usa ka doktor o ba kaha sa usa ka hilot nga makamao ning buhata.

Sa hilom nangusisa ko kun unsay angay buhaton aron malaglag ang usa ka bata gikan sa sabakan. Dili na mausab pa ang akong hukom. Kinahanglan gyud nga makuha ang bata nga akong gisabak sa dili pa mobusyad ang akong tiyan. -- Sumpayan pa