Sukli sa utang

 (Gula 70)

Duha ka adlaw sa dili pa ang pormal nga pagsugod sa mga klase. Tugob sa kasubo nga nagpanamilitay kami si Darwin. Kinahanglang mopauli na siya sa Baao aron makapangandam siya sa iyang mga gamit sa pag-eskuyla didto sa Naga City. Manghipos pa siya sa iyang mga butang.

Sa wala pa siya mogikan paingon sa Baao, nag-abot una mi sulod sa usa ka mabugnaw’ng lawak aron pagtagay sa lawasnong kalipay. Human sa mainiton namong panagsawo sa dugos sa himaya, gihatod ko siya sa terminal sa bus diin adto siya manukad pagsakay paingon sa ilang lungsod.

Sa pagpauli ni Darwin, ingon sa gibati ko ang kahaw-ang sa akong kinabuhi. Maayo gani kay nagsugod na ang klase nianang pagkasunod adlaw. Natibhangan ang akong kalaay ug kamingaw kang Darwin gumikan kay busy na man sab ko sa akong pagtuon sa kursong accountancy.

Matag Sabado magkakita kami si Darwin. Siya mismo ang moadto sa akong gipuy-an. Ug kay ako ra man laging usa ang mahibilin sa balay kun adlawan, walay makatugaw namong duha samtang magtagbaw kami pagtagay sa lawasnong kalipay.

Sa kolehiyo nga akong gi-eskuylahan, nahimamat nako si Harold Enson. Kursong engineering ang iyang gikuha. Nakigsuod siya nako. Nakamatikod ko nga na-attract siya sa akong beauty. Ako kining nasabtan pinaagi sa iyang sinultihan, lihok ug tinan-awan.

Ambongan si Harold. Mora’g si Leonardo de Caprio kun kalitan sa pagtan-aw. Pero wala koy pagbati niya. Dili nako ibaylo si Harold kang Darwin, ang James Bond sa akong kinabuhi.

Wala gyud ko masayop sa akong pangagpas bahin sa motibo sa pagpakigsuod ni Harold nako. Pipila ka adlaw human kami magkasuod, nangulitawo siya nako. Apan ako siyang gibalibaran. Bisan unsa na lang ang gihimo kong alibi aron ma-justify ang akong pagdumili pagdawat sa gugmang gihalad niya kanako.

Wala na lang sab nako tug-ani si Darwin -- sa higayon nga magkita mi bahin sa pagpangulitawo ni Harold nako. Para nako, dili na kinahanglang masayod pa siya niini. Total, wala man ko magluib sa among relasyon. Wala man nako patoli si Harold. Dili sab ko gusto nga mahasol pa ang hunahuna ni Darwin bahin sa pagpangulitawo ni Harold nako.

Matag Sabado magkita gyud mi si Darwin. Hangtod miabot ang bulan sa Hulyo. Mao pay akong pagkamatikod nga duha ka bulan na, kapin kun kulang, wala na ko reglaha. – Sumpayan pa