"Incubus"

Gula 114

Paglabay sa us aka semana, mitungha si Prof. Feder Vercelli sa among gipuy-an. Nagsusi siya sa akong kahimtang human ko makagawas sa hospital.

“Angay mong mangandam, Mrs. Salcano,” nagkanayon si Prof. Vercelli.

“Nga-ngano man, Prof. Vercelli?” si Dirk ang nangutana.

“Tungod kay nasuko pag-ayo karon ang incubus nga amahan sa bata nga kalit lang nahanaw didto sa hospital human benditahi sa pari,” sugilon sa psychic.

“U-unsa?” nakatuaw ko pagkadungog sa gisugilon ni Prof. Vercelli.

“Base sa resulta sa akong pag-monitor,” sa psyhic pa, “namatay gyud ang bata nga imong gihimugso, Doktora Salcano. Milampos ta pag-neutralize sa gahom sa daotang espiritu nga diha sa iyang lawas ug maoy naghatag niya’g kinabuhi.”

“Kun mao kana, Professor,” sagbat ni Dirk, “wala na kita’y angay kabalak-an.”

“Aduna, Mr. Salcano,” matud sa psychic. “Lig-on pa ang amahan nga incubus. Ug sa gikaingon ko na, naglagot siya pag-ayo karon gumikan sa kamatayon sa iyang anak. Posibleng mohimo siya’g mas grabe pang pagpanghasi kaninyo anytime now.”

“M-my God,” mao ray akong nalitok.

“Samtang dili pa nato mabuntog sa hingpit ang incubus, dili makabaton og hingpit nga kalinaw ang inyong pagpuyo,” pasidaan sa psychic.

“Unsa may angay namong buhaton, Professor,” si Dirk ang nangutana, “aron mabuntog namo ang incubus?” Kon ordinaryo pa lang siyang linalang, andam kong makig-away niya. Ang problema kay dili siya makita.”

“Mangita tag paagi, Mr. Salcano,” matud ni Prof. Vercelli. “Mosalig kita sa Dios. Sa pagkakaron, kinahanglang bantayan mo kanunay si Doktora Salcano kay siya’y target sa incubus. Ayaw kamo pagpanuko sa pagsangpit nako kon aduna kamoy katingad-an aron ako dayon kining masusi.”

“Buhaton namo kana, Professor,” ni Dirk.

Sa hilom, mibati ko’g kabalaka sa gisulti sa psyhic. Nahisagmuyo kong naghunahuna nga wala pa diay matapos ang problema namo ni Dirk. -- Sumpayan pa