"Incubus"

Gula 112

Morag naglisod si Prof. Feder Vercelli pagkombinser ni Fr. Dean Ejara. Ingon sa gustong palutawon sa pari nga superstition ang baroganan sa psychic.

“Dili ta magdaog kun maglalis ta, Padre,” nagkanayon si Prof. Vercelli. “Gawas pa, dili karon ang tukmang panahon aron lantugian ta kanang butanga. Ang mahinungdanon karon mao nga matabangan ta ang magtiayong Salcano.”

“Pero dili ko gustong mahimong partaker sa superstition,” matud ni Fr. Ejara.

“Ug tungod niana imakuli mo ang imong tabang ngadto sa magtiayon nga nagkinahanglan sa imong panabang,” matud sa psychic. “Mga Kristiyanos usab sila. Katawhan usab sila sa Dios nga imong gialagaran. Di ka kaha makonsensiya kun ihikaw mo ang imong tabang ngadto kanila? You have everything to gain and nothing to lose kun imo silang tabangan.”

Wala motubag si Fr. Ejara. Ingon sa naghinuktok kini. Unya nanglingi ming tanan ngadto sa bata dihang mihilak kini samtang naghigda sa akong tupad. Gidali pagduol ni Dirk ang bata ug gipahilom.

“Nagkinahanglan og bendita ang bata, Padre,” gikan ni Prof. Vercelli. “Ug ikaw lang ang makahimo niini kay ikaw man ang may awtoridad paghimo sa ingon.”

“Wala pa ko makahimog ingon niini sukad masukad,” matud ni Fr. Ejara. “Ang mobendita’g bata nga gituohang anak sa usa ka daotang espiritu.”

“There must be a first time for everything, Fr. Ejara,” sa psychic pa.

Namatikdan ko nga diha nay truce tali kang Fr. Ejara ug Prof. Vercelli. Gipahimutang sa pari ang dala niyang bag sa tiilan sa hospital bed nga akong gihigdaan. Giablihan niya kini ug gikuha ang sudlanan sa bendita.

“Suod kong higala sila si Ingrid ug Dirk Salcano,” giingnan niya si Prof. Vercelli. “Sa ngalan sa among kasuod, benditahan ko ang bata.”

Ug gisugdan dayon ni Fr. Ejara ang pagbendita sa bata nga akong gihimugso. Nakugang mi kay miaso ang bata pagkaigo sa tinulo sa bendita. Mihilak og maayo ang bata. -- Sumpayan pa