'Incubus'

(Gula 111)

Daw nakugang si Fr. Dean Ejara sa gisulti ni Dirk. Gitutokan niya’g maayo ang akong bana. Unya mitan-aw siya sa bata nga bag-o lang nahimugso nga diha sa akong kiliran. Dayon mitan-aw sab siya nako sa wala pa siya moatubang og balik kang Dirk.

“Benditahan o bunyagan?” Gisukna sa pari ang akong bana.

“Benditahan, Padre,” ni Dirk pa. “Mao ra kanay gusto namong imong buhaton sa bata nga gihimugso ni Ingrid.”

Mikunot ang agtang sa pari.

“Kinahanglang mabenditahan kining bataa, Padre,” matud ni Dirk sa tuno sa tingog nga ingon sa mamandoon, “tungod kay anak kini sa demonyo.”

“Nga-nganong nakasulti kamo’g ingon niana?” Misamot og kalukot ang panit sa agtang ni Fr. Ejara.

“Tungod kay dili mahitabong makahatag ko’g anak kang Ingrid tungod kay nasusi na ko sa doktor ug nasuta nga sterile ko nga pagka lalaki,” mipasabot si Dirk. “Gawas pa, si Prof. Feder Vercelli nakadiskobre nga may usa ka daotang espiritu nga nanghilabot kang Ingrid ug maoy amahan niining bata nga iyang gihimugso.”

“Mao kana, Fr. Ejara,” misagbat si Prof. Vercelli. Usa ka evil spirit nga gitawag og incubus ang amahan sa bata nga gihimugso ni Doktora Salcano.”

“This is insane, Professor,” sa pari pa. “A sort of dualism.

“It’s not insane, Fr. Ejara,” mipakisi ang psychic. “Neither it is sort of dualism or split Christianity. Nasayod kong lahi ang imong pagtuo ug baroganan kay sa akoa, but this time mas maayong magtinabangay ta. Nagkinahanglan sila si Mr. ug Mrs. Salcano sa atong panabang. Isalindot ta ang managsukwahi tang prinsipyo. Ang importante nga matabangan ta ang magtiayong Salcano.”

Wala motingog si Fr. Ejara. Ingon sa gihinuktokan niini ang gisulti ni Prof. Vercelli. Gipahit sa pari ang iyang wait.

“Kinahanglang mabenditahan ang bata, Padre,” matud sa psychic, ‘aron ma-neutralize ang gahom sa incubus nga anaa sa iyang lawas.” – Sumpayan pa