“Incubus”

“Gikuyog ko siya dinhi, Sweetheart,” ni Dirk pa nga ang gipasabot mao ang psychic nga iyang kauban, “aron iyang masusi ang imong kahimtang. Pamasin lang.”

“Dili unta ko mokuyog sa imong bana, Doktora Salcano,” nagkanayon sab si Prof. Feder Vercelli, “sa kabalaka nga aduna tay conflict of interest sanglit managlahi man tag field of proficiency.”

“No problem, Prof. Vercelli,” giingnan ko siya. “Buhata ang gituohan mong maayo ug angay and I’ll be more than willing to submit myself to your idea.”

Gisugdan dayon ni Prof. Vercelli ang paghiling nako. Iya kong gipalingkod og tarong. Dayon gitapin-an niya sa iyang palad ang akong ulo.

“Mabdos ka man diay, Doktora Salcano,” nagkanayon ang psychic dihang mao nay iyang gitapin-an ang akong bat-ang.

“Kuno,” giingnan ko siya. “Pero dili kana ang nakahasol nako, Professor, kun dili ang kanunay nga pagpangatol sa akong genitals panahon sa kagabhion.”

Gisuginlan ko si Prof. Feder Vercelli sa nahitabo nako sukad nga naminyo kami si Dirk. Mitabang sab si Dirk sa pagpasabot sa psychic sa tanan. Giasoy namo ngadto kaniya ang among pagdangop kang Ingko Honorio nga tambalanan hangtod na sa among pagpakonsulta ngadto sa usa ka geomancer kinsa miingon nga gidaotan ko sa usa ka nature spirit. Igo lang miyangoyango si Prof. Vercelli nga naminaw namo samtang nagpadayon siya sa paghiling nako.

“Husto ang gisulti niadtong geomancer nga inyong gidangpan,” nagkanayon ang psychic human sa iyang paghiling nako.“Gidaotan ka sa usa ka nature spirit. Usa ka astral and ghostly entity ang nanghilabot nimo, Doktora Salcano.”

“M-my God,” mao ray akong nalitok human madungog ang gipadayag sa psychic.

“Ang nakapait pa gyud kay lakip ang kaminyoon ninyo ni Mr. Salcano iya sab nga gihilabtan,” matud sa psyhic.

“U-unsay buot mong ipasabot, Professor?” Nakasukit ko. -- Sumpayan pa