Mga hagok sa bungbong

Nahunong ang kulakabildo sa mga card dealers sulod sa Junket Room dihang nabati nila ang kusog kaayong hagok sa bungbong. Nagtinan-away silang tanan sa tumang kahibulong. Nganong duna kahay maghagok sa bungbong, no? Ug nganong iatol man gyod kada ala 1:00 sa kaadlawon?

Mousa na ka semana kapin nga naobserbaran nila ang maong tunog sa hagok. Usahay, di nila tuyoon, mokalit lag panindog ilang mga balhibo kay lain kaayog tuno ang maong hagok. Daw lawom nga tukikaka gikan sa masakitong linalang.

"Ay sus, ordinaryong tawo ra kana nga naghagok, uy." Komentaryo ni Buddy, kinsa maoy isogon sa ilang grupo. Unya giduol gyod niya ang bungbong ug gipatungdan ang gigikanan sa hagok. Gihikap-hapuhap pa!

"Uy, hala, Buds, mibalhin lagi ang tingog." Hapit magkadungag yawit silang Raul ug Billy, iyang mga kauban sa lamesa, kinsa nakaobserbar nga ang hagok ingon sa mipalayo ni Buddy. "Naa na sab sa imong likod, Buds, oh." Dayong tudlo nila sa pikas bahin sa bungbong nga konkreto.

"Bitaw da!" ni Buddy pa nga mao na poy gipuntariya ang dapit nga gitudlo.

Apan ingon sa adunay pako ang maong hagok. Tungod kay pagduol ni Buddy, nawala kini ug didto na sab nila mabati ibabaw sa di kaayo taas nga kisame.

Napun-ag laing katingala ang ilang gibati. Naglumbag ruyda ang ilang utok ngano? Mao nga nakahunahuna na lag lingkod si Buddy sa gibiyaan niyang silya. Ning tungora, ang hagok mibalik sa orihinal nga gigikanan -- niadtong dapit sa bungbong, diin didto nila una kining nadungog. Butang nga nakapasamot pag-inat sa ilang mga kilay.

Wala makaantos si Sir Louie, ang ilang manedyer nga taudtaod na pod diay'ng nagpaminaw lang sa ilang gikahibudngang hagok. Dili daling motuo ang maong ex-seminarian sa mga kahibulongang hitabo nga iyaha sa dili ingon nato.

"Kanang hagok nga inyong nadungog, wala ra na sa kumingking sa laing tingog nga akong nabati sa miaging semana dinhi." Pahibalo sa manedyer nga nagbarog duol sa lamesang taas nga dunay telepono. "Abi ninyo, dili kay hagok lang ang akong nabati. Kun dili, tawo gyod nga naligo sa shower. Mao nga wa gyod ko batiag kalisang niining hagok nga atong nadungog karon. Nagtuo ko nga kanang pikas nga gialihan ining bungbong, kuwarto na sa mga guests niining hotel. Busa, normal lang nga makadungog kitag hagok."

"Unya magbalhinbalhin diay kun duolon, Sir?" Nagkuros silang Billy, Raul ug Buddy sa pagsukna. "Ikaduha, baga kaayo ang pagkasemento niining bungbonga." Padayon ni Billy nga wa makombinse sa pamahayag sa manedyer. "Ug labaw sa tanan, sound proof pa gyod!"

"Ay sus, kuwarto lagi kanang luyo niining bungbonga. Mao nga makadungog gyod tag hagok." Pamugos ni Sir Louie sa pagpatuo. "Buyno," mihana kinig punit sa telepono. "Aron mahatagan og tin-aw'ng tubag kanang kahibulong nga mihasol sa inyong hunahuna, motawag tag taga mintinans ug atong pangutan-on kun kuwarto ba gyud kanang naa sa likod."

Wala madugay,  miabot ang panday sa mintinans. Dili nila sinati ang nawong niini. Tingale, bag-o lang kining naasayin dinhi. "Ang hain ining bungbonga, Sir? Kini?" Sa karpentero pa nga midukoldukol sa bungbong gamit ang gikumo niyang palad.

"Oo, kini. Kuwarto ang naa sa luyo ini, no?" Sa menedyer pa nga ingon sa segurado kaayong usa gyud ka lawak ang maong dapit.

"Dili na kuwarto, Sir." Pintok nga tubag sa panday. "Wala na kanay kuwarto diha sa likod. Kay bungbong na man gyud kining atong nahimutangan sa hotel. Kun buslotan ni nato, makita na nato ang gawas."

Naamang ang manedyer. Lakip na ang iyang mga sakop nga nakadungog sa tubag sa panday, nahilom pod. Naglumba ang pagpamarog sa ilang balhibo. Samot na, dihang kalit lang nawala ang panday sa ilang panan-aw -- dungan sa hingpit nga pagkahanaw sa nagdeliryong mga hagok sa bungbong. (Kataposan)