Sukli sa utang

Nabatyagan ko ang pagpanginit sa akong aping. Namula tingali ang akong nawong. Nakalitan ko sa pangutana ni Kuya Ethan maong wala dayon ko makatubag. Wala ko kini kapangandami.

“Tubaga ko, Editha,” nagkanayon ang akong maguwang kun sa Binisaya pa kay Bicolano man lagi ang among sinultihan. “Unsay gianhi mo ning dapita?”

“Ku-kuan, Kuya,’ mikurog og diyotay ang akong tingog. “G-gikan ko sa gipuy-an sa akong amiga. May tuyo ko niya.”

“Mao ba?”

“Mao kana, Kuya, ug padu’ng nako mopauli.’

“Maayo hinuon. Kun mangita sila si Papa ug Mama nako unyang hapon, ingna nga madugay ko’g pauli. May gimmick ko karon uban sa akong mga barkada. Moadto mi sa Pili. Ikaw nay bahalang mopasabot nilang Papa ug Mama, ha.”

“Oo, Kuya.”

Mibiya na si Kuya Ethan sa akong nahimutangan. Milabang siya sa dalan ug unya naglakaw subay sa aseras. Wala madugay, nahanaw na siya sa akong panan-aw dihang miliko siya sa usa ka eskina.

Ako nga nagpabiling nagbarog sa may jeepney stop ingon sa naibtan og tunok. Nakaamgo ko nga kinahanglang doblehon ko ang akong pagbantay ug pag-amping. Delikado kun masakpan sa akong mga maguwang ang kinawat-kawat nga panagtagbo namo ni Darwin.

May jeep nga nagsingabot. Gipara ko kini. Paghunong niini sa akong tungod, misakay dayon ko.

Nianang pagka-Biyernes, nahinayon ang panag-abot namo ni Darwin sa public plasa sa Iriga City. Ang awhag sa kahidlaw sa pagtagay sa lawasnong kalipay maoy hinungdan nga dili ko makabalibad sa pagpakigkita ni Darwin. Morag naadik ko sa gihimo niyang pagana maong magpangita ko niini matag karon ug unya. Magsalimuang ko sa mga gabii nga maghunahuna ko sa matam-is ug mainitong romansa namo ni Darwin. Maong magpanikad gyud ko sa pagpakigkita niya.

Sama sa naandan, nahisangko mi sulod sa usa ka pribadong lawak. Dili gyud ko makabalibad ni Darwin sa higayon nga dad-on ko niya sa motel kay ingon sa dili na ko makakontrolar sa akong kaulag. Ingon sa migahom na sa hingpit sa akong kaisipan ang nagdilaab nga tinguha sa pagtagamtam sa kalalim sa lawasnong kalipay. -- Sumpayan pa