Sukli sa utang

Gula 55

Gusto ni Darwin nga kada adlaw mi magkita kay mingawon kuno siya nako kun dili ko niya makita bisan sulod lang sa usa ka adlaw. Flattered kaayo ko sa iyang gisulti apan wala ko magpasabot niya nga mao kini ang akong gibati–nga nalipay ko sa iyang mga bolada.

“Inga hinuon nga kini imong gikamingawan,’ giingnan ko siya dungan ang paghapuhap ko sa nag-ugdong butang ubos sa akong pus-on.

“Apil na kana,” ni Darwin pa. “Ikaw goy nagdala niana. Maong magkita na sab ta ugma.”

“Dili mahimo kun atong sagunsonon. Tingalig madiskobrehan sa akong mga ginikanan nga may gihimo kong binuang.”

“Kanus-a man diay ka makalugar?”

“Sa Sabado.”

“Kadugay pa ana, uy. Sa Biyernes na lang.”

Wala ko motingog. Naghunahuna ko sa makadiyot.

“Sige na, Editha,” nagkanayon si Darwin. “Sa Biyernes na lang ta magkita.”

“S-sige,” mubo kong hukom. “Asa man ta mag-abot?”

“Sa plasa lang gihapon. Sa may fountain. Mga alas dos gihapon.”

“Sige. Magpaabot ko nimo didto.”

Nanggawas na mi sa motel. Pero wala mi magkuyog paggawas. Nag-una ko. Misunod sab dayon si Darwin. Taktika kini namo aron kun may kaila mi nga makakita namo, dili nila masabtan nga may relasyon mi. Ambot ba, uy! Defensive ra tingali ko kaayo. O advanced lang ang akong hunahuna maong nakahunahuna ko’g ingon niini nga panagana.

Milabang ko sa pikas tampi sa karsada aron adto manakay og jeep paingon sa among gipuy-an nga dapit. Dihang nakalabang na ko, milakaw pa ko paingon sa unahan diin didto nahimutang ang jeepney stop. Layo-layo na kini gikan sa nahimutangan sa motel.

Samtang nagtindog ko sa may jeepney stop kay naghulat og kasakyan, nabati ko nga may tingog sa lalaki nga misangpit nako. Sa akong paglingi, nakugang ko kay maoy akong nakita si Kuya Ethan nga naglakaw paduol nako. Wala ko magdahom nga magkita mi ning dapita.

“Nag-unsa ka man dinhi?” Nangutana ang akong maguwang. “Nganong nahiabot ka man ning dapita?”

Wala dayon ko makatubag sa pangutana ni Kuya Ethan. -- Sumpayan pa