Si Magda tuwad

Mga bata ang pakit-on ni Magda sa iyang pagtuwad. Alang kaniya malipay siya nga magtuwad kun ang iyang abton mga bata. Dili baya niya hilabtan ang matag bata nga iyang abton, kay  ang iyang tuyo mao man nga malingaw siya.

Ganahan man god si Magda nga magtan-aw sa usa ka bata nga malisang ug unya magpaninggit nga magdagan pauli sa ila. Ang tanang anak sa iyang mga silingan nga nagpangidaron nag diyes anyos ngadto sa trese nakakita na sa iyang pagtuwad.

“Kit-an dyud nako, nang Magda nga nagtuwad diha agianan duol sa punoan bugtai,” nagkayungit si Bitoy nga anak ni Nene-Carding nga misugilon sa iyang tatay ug nanay.

“Yati ra, si Magda gyud kaha ang imong nakita nga nagtuwad, dong Bitoy?” mora’g way pagtuo si Milong nga nangutana sa iyang anak.

“Siya dyud lagi, tay Milong, katawa gani siya dihang dagan ko sutoy,” sa bata pa nga morag nangluspad ug unya gipaningot og bugnaw.

Ug dili lang kay si Bitoy ra ang giabat ni Magda, hasta sila Tuting, Ikoy, Monito, Royroy ug uban pang mga bata nga anak sa mga silingan ni Magda. Matud pa dugay kuno nga nakapuyo si Magda sa Capiz ug taga didto usab kuno ang nabana niini, ug kay patay na man ang bana ni Magda maong mibalik siya nganhi sa Sta. Romana. Ug karon mao na ning iyang pagabuhaton sa mga bata, iyang kalingawan og abat apan dili niya unsaon o bugnuon. Iya lang hadlokon ang mga bata.

Unya usa ka sayong buntag nakita sa mga silingan nga nag-aso ang kusina ni Magna nga morag nagsugba og karne o unsa ba diha.

Gikan sa buntag hangtod sa udto ug ingon man sa pagka hapon makita gyud sa mga silingan ang bagang aso ug unya humot nga sinugbang karne nga morag ang-ang baboy o baka.

Kada adlaw gyud ingon sa way undang ang aso sa kusina sa gikahadlokan sa mga bata nga si Magda, kay kuno lagi mangabat nga magtuwad. Unya, nagubot ang kasikbit nga balangay kay matag gabii kuno magsige’g pamalbal ang usa ka mangtas nga ungo.

Dihang ilang gilutos dinhi kuno paingon sa balangay sa Santa  Romana. Ang bagis nga si Simo nagduda na gyud kang Magda, busa, usa ka adlaw, sa sayong buntag iyang giadto ang payag niini. Humot nga sinugbang baboy ang misugat sa panimaho ni Simo ug nagsige’g aso sa may abohan ni Magda.

Misaka og kalit si Simo ug sa iyang pagsaka maoy iyang nakita si Magda nga nagkaon og bag-ong inad-ad nga sinugbang baboy. Nahasiga ang mga mata niini pagkakita kang Simo. Unya giagda si Simo ni Magda apan mibalibad kini.

Unya, may nasigpatan si Simo nga morag giputos sa silopin nga karne nga didto ibutang sa may banggira, iya dayong gitan-aw ug nakapanghesus siya kay maoy iyang nakita ang morag giputolputol nga bukton sa tawo. Nangisog si Simo.

“Unsa nang naa sa banggira, ha, unsa na? Dili man na karne sa baboy ug dili pod na karne sa baka, kaila kog karneng baka ug baboy, uy!” giibot ni Simo ang iyang hait kaayong plamengko apan kalit lang milayat si Magda nga mora’g iring agi sa binuksang bentana.

Gilutos ni Simo apan wala na niya hiapsi. Unya mibalik si Simo pagka gabii apan wala na si Magda ug nasabot niya nga milayas kini kay wala  na man ang ubang mga butang niini.

Samtang naglakaw si Simo pauli sa ilaha, tataw didto sa iyang handurawan ang dili karneng baboy ug karneng baka gisugba ni Magda, kay sa tan-aw niya morag mga bukton gyud og tawo nga giputolputol. Dinhi nagduda na siya nga si Magda usa ka ungo. -- Kataposan