“Incubus”

Gula  96

Wala mamauli ang akong mga ginikanan ngadto sa Talisay nianang pagkagabii. Didto na sila matulog sa among balay. Gipahimutang sila si Dirk sa guest room. Miatake na sab ang katol sa akong sexual organ apan ingon sa nakakuha kog kusog gikan sa akong mga ginikanan aron pakigbatokan ang maong sakit. Nagpasalamat ko kay wala molungtad og dugay ang kakatol nga mihasi kanako.

Pagkaugma, nanglakaw dayon sila si Papa Gustavo ug Dirk human sa pamahaw. Walay tumong ang ilang lakaw. Siksikon kuno nila ang mga dapit sa Sugbu aron mangitag albularyo nga makahiling kanako. Nagduda sab ang akong mga ginikanan nga usa ka daotang espiritu gyud ang nanghilabot nako mao nga wala maalim ang pagpangatol sa akong genitals sa mga tambal  nga akong gilamoy.

Kami rang duha si Mama Dortha ang nahibilin sa balay. Nalingaw kong nakigsulti sa akong inahan. Sukad nga naminyo kami si Dirk, karon lang nahitabo nga nagkasulti mig ingon niini ka private. Ingon sa nahupay og diyotay ang akong kabalaka sa sakit nga mitakboy nako gumikan sa moral support nga gipakita sa akong mga ginikanan.

Hapon nang nahibalik sa balay sila si Papa Gustavo ug Dirk. Dala nila ang kapakyasan sa ilang pagpauli. Nahisum-ok na kuno sila sa lainlaing kalungsoran ug hilit nga kabarangayan sa lalawigan sa Sugbu apan wala gayod sila makakita og tambalan nga mao untay makasusi kun unsa gyuy nahitabo nako.

Wala gihapon mamauli ang akong mga ginikanan sa misunod nga mga adlaw. Nagpabilin sila sa balay. Sila’y nag-atiman nako samtang si Dirk mireport sa trabaho. Nakasabot sila sa nature sa trabaho sa akong bana.

Usa niana ka buntag, lain kaayo ang pamatyag ko sa akong lawas. Morag luod kaayo ang akong kuto-kuto. Unya, dihang ingon sa mahabwa na ang akong ginhawaan tungod sa dili masabot nga kabidli, midagan ko ngadto sa banyo. Didto misuka ko taman sa ginhawa. -- Sumpayan pa