“Incubus”

Gula  93

Ingon sa misamot ang kagrabe sa kakatol nga akong  nasinati sa pagsugmat sa pagpangatol sa akong sexual organ. Sa higayon nga moatake na ang kakatol , magkisi-kisi ko sa ibabaw sa kama. May mga higayon nga dili ko makapugong sa paghilak tungod sa naghingapin nga kakatol. Morag mabuang  ko sa maong kakatol.

May mga higayon nga makatulog na unta ko apan mahigmata ko tungod sa pagpangatol sa akong sexual organ. Morag dunay manuslok sa akong genitals nga maoy hinungdan sa kakatol .Ang  pagpangatol magsugod sa vulva ug kini ingon sa misangko na ngadto sa ilawom sa akong vagina. Labihan gyong katola!

Kanunay matugaw ang akong pagkatulog gumikan sa kakatol. Kasagaran, mao nay akong himat-an ang kakatol sa akong bilahan hangtod sa sulod sa akong sabakan.Morag  dunay gagmay’ng mga mananap nga nangamang sa ngilit sa bukana sa akong pagka babae ug daw misulod ngadto sa ilawom. Apan wala koy nakita nga bisan unsang mananap. Nagtuo ko nga ang mga kagaw nga nanggimok maoy akong nabatyagan nga daw nanguyamang. Ug  haskang katola. Lami gyod kaayong isingit  tungod sa kakatol.

Tungod ba kaha sa kakatol nga akong bation sa higayon nga, mosugmat na ang makalilisang sakit nga wala nako hisabti, maluya ko inigkabuntag. Mora bag gipangagiwan ko sa kusog. Kapoy kaayo ang akong lawas.

Unya, usa niana ka gabii, nahigmata ko gikan sa lawom na untang paghinanok gumikan kay misugmat na usab ang kakatol sa akong genitals. Nahibulong ko kay wala na man koy underwear sa akong pagmata. Nahulog na kini didto sa ubos sa kama. Gipukaw ko si Dirk ug gipangutana kun iya ba kong gihuboan.

“Wa, uy ,” laktod nga tubag ni Dirk.

“Unya,” nako pa,” nganong didto naman sa sawog ang akong underwear sa akong pagmata?”

“A-ambot lang...”

Unya, midali ko’g sulod sa banyo aron manghugas kay migimok na sab ang kakatol sa akong genitals.  (Sumpayan pa)