Sukli sa utang

Gula 46

Gikulbaan ko. Sukad masukad, karon lang nahitabo nga nagsusi si Papa Augusto mahitungod sa akong lakaw. Nakamatikod na kaha siya nga may gihimo kong milagro? Nakapangutana ko sa hilom sa akong kaugalingon. Mibati ko’g diyotay’ng kabalaka.

“Ngano bang nadugay ka man og pauli kaganina, Editha?” Pangutana gikan kang Mama Clemencia. “Di ba usa ka oras kapin ra man ang misa? Pero mag-alas dose sa udto na lang kaganina wala ka pa gyud mahiuli nga unta sayo ka man kaayong migikan. Namiya na lang mi sa balay bisan wala ka pa dihang menos kinse para alas dose na.”

Nalipay ko sa ulahing gisulti ni Mama kun unsang orasa sila migikan paingon sa tindahan. Naghatag kini nako’g ideya kun unsay lusot nga angay kong himuon. Tuod man, nakabuylo gyud ang akong pamakak.

“Alas dose bayente na ko nahiuli kaganina, Ma,” nako pa. “Wa na man god ko makaabot sa misa sa alas nuybe. Sa misunod nga misa na lang ko nisimba. Dugay sab natapos ang misa nga akong gitambongan kay dihay kasal nga gidungan.”

Nasayod kong buhi kaayo ang akong pamakak. Pero alang nako, bahala nag dili motuo ang akong mga ginikanan sa akong gisulti. Ang importante nga nakadiga kog katarongan agi’g tubag sa ilang mga pangutana.

Maayo gani kay wala na mangutikuti ang akong mga ginikanan. Gitibawas namo ang pangaon. Pagkahuman, gipanghipos nako ang among mga kinan-an. Dayon misulod ko sa akong kuwarto.

Samtang naghayang ko sa ibabaw sa kama sulod sa akong lawak, misantop sa akong hunahuna si Darwin. Nalipay ug natagbaw  gyud ko sa among gibuhat kaganina didto sa motel. Superyor gyud siya’g performance. Layo ra kaayo niya’g performance ang una kong boyfriend nga si Rolando.

Nindot na unta kaayo ang akong paghanduraw sa nahitabo namo ni Darwin dihang kalit lang misal-ot ang kabalaka. Unsa kaha kun momabdos ko? Dili pa ra ba ko andam makabaton og anak. Gubin kini alang nako.

Pero dihang maoy akong gipalabi ang paghunahuna sa excitement and pleasure sa gibuhat namo ni Darwin, nawagtang ang akong kabalaka. Maoy mibanos sa akong hunahuna ang pamahala. Oo, bahala na!

Unya, nakapahiyom ko dihang nahinumdoman nako ang sabot namo ni Darwin nga magkita mi ugmang adlawa. Excited kaayo kong naghunahuna sa umaabot namong panagkita. Karon pa lang gani, ma-imagine na nako kun unsay posibleng mahitabo kun magkita na unya kami. -- Sumpayan pa