Sugilanon Pagbasol

Dakbayan sa Sugbu

Nagmug-ot si Amber nga nakig-atubang kang Howan nga iyang hinigugma karong gabhiona. Wala siyay kadasig. "Namatikdan ko, Am," si Howan maoy mibuak sa kahilom nga mitabon kanila, "nga uga kaayo ang imong tinagdan kanako niining nangaging pipila ka adlaw. Unsa may hinungdan?"

"Pasagdi lang god ko," pinabundak ang pagpamulong ni Amber. "Wa bitaw ko magsamok nimo."

"Dili mahimo, Am," bugnaw kaayo ang sinultihan ni Howan. "Dili ko gusto nga ingon niini ang imong tinagdan kanako. Nabag-ohan ko sa gipakita mong kinaiya."

"Nabag-ohan ka man lang kaha, way problema. Maanad ka ra sa kadugayan."

"Dili, Am. Kinahanglang mahibalik ang kamabulokon sa atong pagtinagdanay sa usag-usa sama sa nahitabo kaniadto."

"Aw, kun dili ka makaantos, magbuwag na hinuon ta."

"A-Amber..."

"Magbuwag na ta, Howan, uy, kay gipul-an nako nianang nawong mo." Dayon niyang tindog ug misulod sa iyang lawak.

Apan didto sa sulod sa lawak, gipanid-an niya si Howan nga nagpabiling naghukdong sa sala. Iya kining gilili sa gilhang sa pultahan nga wala niya itak-op pag-ayo. Nakita niya nga huyhoy ang mga abaga sa ulitawo nga mitindog ug nanaog sa ilang panimalay.

Ang hinungdan nga iyang gibuwagan si Howan bisan wala kini makasala kaniya mao si Trevor. Nasuta man god niya nga wala siyay kaugmaon kun usa lang ka kabos nga sama kang Howan ang iyang mabana. Nakita niya nga makahatag si Trevor og mahayag nga kaugmaon kaniya tungod kay anak kini og sapian.

Wala na mobalik sa panimalay nila ni Amber si Howan sukad niadto. Ug sa pagpamisita ni Trevor kaniya usa ka gabii niana, iyang gidawat ang gugmang gitanyag niini kaniya. Malipayon si Amber sa relasyon nila ni Trevor. Nahinangop siya pag-ayo tungod kay gipamalitan man siya sa ulitawo og mahalon nga mga alahas. Sa hilom nakaingon siya nga wala gayod siya masayop nga giilisan niya si Howan kang Trevor tungod kay gihatag man ni Trevor ang tanan niyang gipangandoy nga maangkon.

Hangtod nga wala siya makabalibad dihang mihangyo si Trevor nga manulod sila sa usa ka pribadong lawak sa motel. Didto gitugyan ni Amber ang iyang kaputli ngadto sa lalaki. Hangol ang ulitawo nga mikutlo sa lab-as nga mga gihay sa iyang pagka babaye.

Wala siya mabalaka sa nahitabo nila ni Trevor. Mipasalig ang lalaki nga andam kini nga mangasawa kaniya.

Ang nahitabo kanila ni  Amber ug Trevor nasubli sa makadaghan. Hangtod nga nagbunga gayod ang ilang gibuhat. Gipahibalo gilayon ni Amber si Trevor mahitungod sa iyang kahimtang.

"Kinahanglang makasal na kita, Trev, sa dili pa maila ang akong tiyan," nagkanayon si Amber.

"Unyag moingon ko nga dili ko magpakasal kanimo? Unsa may imong buhaton?

"Trevor?" nakugang si Amber. "Unsa god kanang sinultihan mo?"

"Gikasubo ko, Amber," ni Trevor pa. "Apan prangkahan ko lang gayod ikaw aron dili ka magsalig. Dili ko mangasawa nimo. Nakaseguro kong dili mosugot sila si Daddy ug Mommy nga mangasawa lang kog musimos nga sama nimo. Gawas pa, nasayod ko nga ang amo rang kuwarta ang imong giapas. Maong gipahimuslan ko na lang usab ang higayon."

"Salbahis ka," ni Amber nga misagpa kang Trevor.

"Managsama lang kitang salbahis. Suma'a kun unsay imong gibuhat ni Howan. Busa magpasensiyahay nalang ta. Bahala ka na sa imong kinabuhi. Anaa ra kanimo kun pakatawhon mo kanang bata nga imong gisabak o dili."

Ug gibiyaan na siya ni Trevor. Bisan giunsa niya kinig tawag apan wala na gayod kini mamati kaniya. Wala tuyoa nahinumdom siya sa buotan niyang hinigugma nga si Howan. Daw mihuot ang iyang dughan. Ug unya mihilak siya gumikan sa tuman nga pagbasol. (Kataposan)