“Incubus”

Gula 89

Wala ko makareport sa akong trabaho nianang adlawa. Si Dirk wala sab moreport sa iyang trabaho. Nag-apong siya nako samtang mipahulay ko sulod sa among lawak. Mobiya lang siya sa akong nahimutangan kun duna siya’y importanteng kuhaon sa gawas sa among lawak. Nahingawa siya pag-ayo sa akong kahimtang.

Miinom ko’g energy drink aron mobalik ang kabaskog sa akong lawas. Gilutoan sab ko ni Dirk og mga pagkaon nga makatabang aron daling mobalik ang akong kalagsik.

“Hain may maayo kun dad-on ko ikaw sa doktor?” Misugyot si Dirk nianang pagka-udto. “Mas maayong mahiling ka aron atong masayran kun unsa gayod kanang sakit nga mitakboy nimo.”

“Doktor sab ko, Sweetheart,” nako pa. “Nasayod ko kun unsay kahimtang sa akong lawas. I know nga dili matugkad sa medisina kining sakita.”

“U-unsay buot mong ipasabot?”

“Nagtuo ko nga duna gyuy daotang espiritu nga nanghilabot nako. Ang pagpangatol sa akong genitals matag gabii may kalabotan sa kaluya sa akong lawas karon. Ug dili ordinaryong katol ang miigo nako kay dili man mawagtang sa bisan unsang tambal.”

“Nan, unsa may atong buhaton karon?”

“Pangitag albularyo nga makaatiman nako.”

“U-unsa?”

“Mao ra tingali kanay bugtong paagi aron makalingkawas ko sa suliran nga mihakop nako karon. Pangita og tambalan. Pagpangutana sa mga tawo kun wala ba silay nailhan nga albularyo nga posibleng makatabang nako.”

“Okey, Sweetheart. Buhaton ko kana.”

“Unya human sa atong paniudto, molakaw ko  aron pagpangita og albularyo.”

“Pero ikaw? Mag-inusara ka lang dinhi sa balay? Kinsa man ang mag-atiman nimo?”

“Dili kinahanglang mag-apong ka kanunay nako. Walay mahitabo kun dili ta mosugal sa risgo. Ako nay bahala sa akong kaugalingon dinhi.” -- Sumpayan pa