"Incubus"

Ingon sa wala motuo si Dirk sa akong gisulti.

"Imposible kana, Ingrid Sweetheart," niya pa.

"Nganong imposible man?" gipangutana ko siya.

"Tungod kay nabuntog na siya sa gahom ni Ingko Honorio. Dili na mahitabong mobalik pa kadtong maong tagulilong sa atong pinuy-anan."

"Pero nganong wala man gyod maayo sa hingpit ang pagpangatol sa akong sexual organ? Nganong nagpabilin man ang kakatol bisan gipailin-ilinan na sa higala kong OB-GYNE ang pagresita nako'g lainlaing tambal aron mamatay ang unsa mang bacteria nga maoy hinungdan sa pagpangatol? Dili ordinaryo kining maong katol, Sweetheart."

Wala motingog si Dirk. Ingon sa gihinuktokan niya ang akong gisulti.

"Gusto kong makigkita ni Ingko Honorio, Sweetheart," nako pa.

"Mag-agad lang ko nimo, Sweetheart," ni Dirk pa. "Kun unsay gituohan mong makaayo alang nimo  buhaton ta kana."

Pagkaugma, wala mi mo-report si Dirk sa tagsatagsa namo ka trabaho. Nanawag lang mi sa tagsatagsa namo ka boss aron pagpahibalo nga dili mi maka-report kay may mahinungdanon ming asikasohon. Apan wala namo tug-ani ang among mga labaw nga ang pagpangatol sa akong sexual organ maoy hinungdan sa tanan.

Nakahasol na pag-ayo nako ang pagpangatol sa akong genitals maong miadto mi sa lungsod nga gipuy-an ni Ingko Honorio. Gusto kong ikonsulta sa albularyo ang akong kahimtang aron pagsuta kun wala ba kini abyi og daotang espiritu.

Hapit na ang alas diyes ang takna sa among pag-abot sa bukirang dapit sa lungsod nga maoy gipuy-an sa tambalan. Apan nabawo kami sa among paghiabot sa iyang pinuy-anan. Ang iya na lang mga apo maoy nagpuyo sa iyang payag. Silay nagtug-an namo nga namatay na diay si Ingko Honorio, tulo ka bulan na ang nakalabay.

Nasubo ko pag-ayo pagkasayod sa maong balita. (Sumpayan pa)