Ang sanggotan ni Pitoy ungo

Ang tuba ni Pitoy maoy kinaham dinhi sa balangay sa Malagamot tungod sa kalami sa templa  niini. Matud pa sa manginomay og tuba nga sila si Minggo, Isong, Pabling, Densio ug uban pang mga mahiligon sa tuba husto gyud sa iyang kapait ug husto usab sa lami niini nga medyo paitpait ug unya tam-is-tamis.

Dinhi sa balangay sa Malagamot upat ka mga tindahan ang magdawatan sa tuba ni Pitoy. Ang  unang tindahan mao ang tindahan ni Maning-Sibya, ang ikaduha mao ang tindahan ni Goling-Tibur, ang ikatulo mao ang kang Sebyo-Damina ug dayon ang ikaupat mao ang tindahan ni Kolas-Jobita. Hinuon dili gyud mahurot ni Pitoy paghatod sa upat ka tindahan kay iya man lang ning pulipulihon.

Kugihan kaayo si Pitoy kay bisag alas tres pa sa kaadlawon mangabis na siya sa iyang sanggotan. Ang iyang asawa nga si Kikay manghod niya’g kinse ka tuig ug maingon nga mora lang og anak ang gintang sa ilang pangidaron. Ug ang nakapait kay sulod sa lima ka tuig nilang panagluon sa salag sa kaminyoon wala gyud sila tugahi bisag usa na lang ka buok anak.

Dinhi nagmagul-anon si Kikay kay gusto niya nga duna silay anak. Si Pitoy man god ang dunay deperensiya nga dili gyud makahatag og anak ni Kikay. Seksi kini si Kikay ug nindot sab og lawas.

Tungod niini, hilom siyang gikaibgan ni Sencio, ang labing bugoy ug labing palikiro dinhi sa ilang baryo. Kausa, dihang nag-inusara si Kikay sa ilang payag kay si Pitoy tua pa man sa iyang sanggotan, kalit lang mitumaw si Sencio ug tayming ra ba nga naligo si Kikay sa pundong tubig diha sa tadyaw nga gibutang luyo sa ilang kusina. Nahatuk-ong og kalit si Kikay kay lagi nagpanti lang ug unya gibadlong niya si Sencio nga dili magpaduol kaniya kay wa pa siya mahuman pagkaligo. Apan inay motuo, giguyod hinuon sa bugoy si Kikay paingon sa sulod sa payag. Milugnot si Kikay apan wa siya’y nahimo sa kusog sa usa ka lalaki. Ug nakuha gyud ni Sencio ang iyang gusto ngadtong Kikay.

“Imo gani ning isulti  sa imong bana ang nahitabo nato ron, Kikay, akong patyon ang imong bana,”  gipinahan ni Sencio si Kikay ug gipakita pa kini sa pistola sa bugoy. Mikurog si Kikay sa kakuyaw. Ug sukad niadto, kanunay na lang dumdomon ni Sencio si Kikay ug hasta ang sanggotan ni Pitoy apilon pa og tangko niini kuyog sa iyang mga barkada.

Unya usa ka gabii, nakugang si Kikay kay dunay nagwakwak sa ibabaw sa ilang atop. Ungo! Ungo gyud ron! ni Kikay pa sa hilom. Nahadlok siya kay si Pitoy tua pa sa sanggotan niini namakgot. Kusog ang tingog sa wakwak. Unya hinayhinay kining nagkalayo nga morag adto paingon sa tindahan ni Maning-Sibya nga dunay nanag-inom ug ang nanag-inom didto mao sila si Sencio kuyog sa iyang mga barkada nga mga bugoy usab. Mibukot na lang sa iyang habol si Kikay sa kahadlok.

“Kadungog mo, mga parts, tingog ron sa wakwak. Duna diay ungo dinhi sa ato, ha,” ug giibot ni Sencio ang iyang pistola ug mipasalba. Apan nagpadayon pagtingog ang wakwak nga morag naglagot hinuon pag-ayo. Unya kalit lang mitumaw ang wakwak ug gipangbugno sila si Sencio.

Mialibwag pagpanagan ang tulo ka barkada ni Sencio ug si Sencio ang giayo pagbugno sa wakwak. Wala makalihok si Sibya nga nakasaksi sa gibuhat sa ungo. Bangis kaayo ang ungo nga mikuniskunis sa tiyan ni Sencio ug unya nakita ni Sibya nga giibot sa ungo ang kinatawo ni Sencio ug wala na kini kinabuhi nga gibiyaan sa ungo nga milukso ug unya kalit lang nahanaw.

“Kikay, ablihi ko,” ni Pitoy pa nga misangpit sa iyang asawa.

Giablihan dayon ni Kikay ang pultahan ug nakuyawan siya sa iyang nakita, “P-Pitoy, kadaghang dugo sa imong bukton ug nawong?”

Wala motubag si Pitoy nga misulod sa payag. -- (Kataposan)