Ulahi na ang pagbasol

Si Ariel igo lamang nakatungtong sa ikaupat nga ang-ang sa elementarya. Apan daghang mga milyonaryo ug mga titulado ang nasina kaniya. Kana tungod kay ang iyang politikanhong kalamposan dili man nila mahimo.

Tungod sa iyang tinguha nga aduna gayoy income alang sa iyang inadlaw-adlaw nga panginahanglanon nakatrabaho gayod siya isip usa ka radio talent sa usa ka inilang estasyonan sa radio dinhi sa dakbayan sa Sugbu. Hangtod nga nahimo siyang radio announcer.

Gumikan sa iyang kaligdong ug way kahadlok nga moataki sa mga kahiwian sa kagamhanan, dali ra siya nga nisikat. Gani, daghan mang radyo stations ang nag-ilog kaniya. Kana tungod kay kun makuha siya isip usa ka radyo announcer sa usa ka estasyonan sa radyo seguro man gayod nga motaas ang rating nianang maong estasyonan sa radyo nga mao unya ang hinungdan sa pagbaha sa gidaghanon sa mga sponsors niini.

Gumikan sa iyang kasikat ang mga politiko sa ilang dapit naaghat gayod sa pagtuboy kaniya isip kandidato sa pagka gobernador sa ilang lalawigan. Usa ka tanyag nga wa gyod niya ka balibari.

Bisan sa kadaghan sa kuwarta nga gibubo sa iyang kontra aron sa pagpamalit og mga botos, iya gihapon kining gilubong og taga liog. Kombensido na si Ariel nga ang presensya sa armas, bahandi ug mga berdugo way mahimo kun maalsa na ang katawhan nga magpaninggit sa kausaban sa sistema sa kagamhanan nga naghatag og dakong bentaha sa mga tawo nga anaa mahimutang sa hataas nga hut-ong sa katilingban. Apan nagalugpit sa tawhanong kagawasan.

Tuod man, napili gayod si Ariel nga gobernador sa iyang lalawigan. Apan sa diha na siya sa kataposang tuig sa iyang termino nahubog si Ariel sa gahom. Di na siya managad ug hilabihan na ka garboso bisan sa iyang mga kauban sa media. Gasigi lang siya og saad nga motabang sa pagsulbad sa nagka lainlaing suliran sa katawhan. Apan gamay ra ang gituman.

Nagsigi na usab siya pangawat sa kuwarta sa mga magbubuhis. Hangtod nga niabot na usab ang laing piniliay nga maoy nakahatag og labing dakong leksyon sa iyang kinabuhi. Kay niining panahona gibiyaan na man siya sa katawhan nga maoy nagsapnay ug nagtuboy kaniya kaniadto. Gumikan sa iyang pagpasagad ug pangabuso gitalikdan siya sa katawhan.

Human sa iyang mapait nga kaparotan natugkad na karon ni Ariel nga dili diay angayan nga manghambog sa katungdanan. Kay  kini dili imo. Kun dili gasa kini sa Kahitas-an kanimo. Apan mahimo kining bawion bisan unsang orasa kun iyang himatikdan nga dili ikaw angayan sa iyang pagsalig. Ug sa unang higayon mihilak si Ariel. Apan ulahi na   ang iyang pagbasol. (Kataposan)