‘Incubus’

(Gula 82)

Nagdungan mig sangko si Dirk sa kinapungkayan sa ikapitong langit. Natagbaw mi sa himaya nga among nakab-ot. Tugob sa sensasyon ang among panaghilawas.

Apan wala madugay human sa among pagpinarayganay, mikatol na usab ang akong sexual organ. Labihan gyung katola! Kahilakon na ko sa kakatol. Si Dirk mahingawaon kaayo nga nagtan-aw nako nga mikulismaot ang nawong sa kakatol.

“Tingalig dunay bacteria nga mitakboy nianang imong kuan,” ni Dirk pa.

“Makapatay man bitaw og bacteria ang feminine wash nga akong gigamit,” matud ko. “Pero nagkatol man lang gihapon ni.”

“Unsa man kaha diay kana?”

“Ambot lang. Hugasi nang imoha kay tingalig mao kanay nagdala sa katol.”

“Uy, limpiyo baya kini kanunay.”

Nahikatawa ko sa reaksiyon ni Dirk sa akong gisulti. Unya misulod ko sa banyo dihang daw dili na nako maantos ang pagpangatol sa akong sexual organ. Kasinggiton na ko sa kakatol. Nanghugas ko’g maayo sa akong genitals.

Mora ko’g nahuwasan gikan sa grabeng hilanat dihang nawagtang na ang kakatol. Migawas ko sa banyo. Natukmaan ko si Dirk nga naglingkod sa ngilit sa kama.

“Katol gihapon?” Nangutana siya.

“Dili na,” mubo kong tubag dayong higda. “Mangatulog na ta.”

Gigakos ko ni Dirk. Sa maong kahimtang nakatulog mi sa maayong paghinanok.

Milabay ang usa ka semana. Nagpadayon ang pagpangatol sa akong sexual organ. Kada gabii gyud kong mag-antos niini. Halos wala na koy kinatulgan. Atua ra ko magyampungad sa banyo. Magsige ko’g panghugas. Moarang-arang man ang akong pamatyag kun makapanghugas ko’g feminine wash. Mora’g mokalma ang kakatol.

Sagad molungtad ang kakatol og tulo ka oras matag gabii. Hasta sa kapila ko magbalikbalik sa banyo aron manghugas. Dili masabot ang kakatol nga akong gibati.

“Dili na ordinaryo kanang nahitabo nimo, da,” ni Dirk pa. – Sumpayan pa