Sukli sa utang

(Gula 35)

Human kami si Darwin magkasabot mahitungod sa takna ug dapit diin adto kami magkita sa umaabot nga Domingo, mibiya na siya sa among pinuy-anan. Giserad-an dayon nako ang pultahan.

Gitan-aw nako ang orasan nga nagbitay sa bungbong sa sala. Hapit na ang alas sayis sa sayong kagabhion. Midali kog adto sa kosina aron maghikay. Kinahanglang makapreparar na ko sa among panihapon sa dili pa mahiabot ang akong mga ginikanan gikan sa among tindahan sa downtown.

Igo lang kong nakahikay sa panihapon, nahiabot sila si Papa ug Mama. Misunod sab pagpangabot nga nag-ulhos lang ang tulo nako ka mga maguwang lalaki nga sila si Kuya Ethan, Kuya Harvey ug Kuya Morris gikang naglaag. Giandam dayon nako ang lamesa alang sa panihapon.

Samtang nangaon mi, akong gisuginlan si Kuya Ethan nga mianhi si Peter sa balay kaganinang adlawan ug nangita kaniya.

Human sa pangaon, nanghugas ko sa among mga kinan-an. Pagkahuman, misulod ko sa akong lawak. Gipasagdan ko lang ang akong mga ginikanan nga nanan-aw og salida sa telebisyon sa may sala samtang ang akong mga maguwang mibalik paglaag. Gusto kong mopahulay og sayo kay gibati ko ang tumang kalapoy sa lawas nga akong gibudlay uban kang Darwin pagtagay sa dugos sa lawasnong kalipay.

Dihang naghigda na ko sa kama sulod sa akong lawak ug nagpaabot nga sagakayon sa katulogon, maoy misantop sa akong hunahuna ang nahitabo tali namo ni Darwin. Hangtod karon morag dili pa ko makatuo sa kapaspas sa mga panghitabo. Kaganina lang nako gisugot si Darwin ug may nahitabo dayon namo. Dili lang makausa kundili makatulo gyud.

Nakapahiyom kong naghunahuna sa maong hitabo. Belib ko sa kaagresibo ni Darwin bahin sa sex. Labaw sa tanan, nakadayeg ko sa iyang kahanas nga modula og palami. Sobra kaayo sa akong expectations ang gidalit niyang performance sa kama. Natagbaw gyud ko sa among gibuhat.

Pagka-Domingo, sayo kong nangandam sa akong kaugalingon. Nananghid dayon ko nilang Papa ug Mama nga mosimba ko. Gitugtan ko nila. Nahimuot ko sa hilom. Wala lang silay kasayoran nga dili ang pagsimba maoy tinuod kong tumong kun dili ang pagpakigkita kang Darwin.

Menos kinse para alas nuybe sa buntag migikan ko sa among pinuy-anan paingon sa UCV Resto Cafe diin adto kami mag-abot si Darwin. Alas 9:30 ang among sabot nga magkita. Alas 9:10 nahiabot na ko sa maong dapit. Pero nag-una na diay kanako si Darwin didto. – Sumpayan pa