Sa tunga sa langit ug imperno

Sa dinhi pa sa yuta ang atong Ginoong Hesukristo, may parabola siya mahitungod sa nag-ulang sa langit ug imperno. Ingon niini ang iyang gihatag  nga parabola.

May usa ka tawong dato, kini siya nag-ilis sa iyang mahalon nga biste kada adlaw. Mga lamian nga pagkaon ang iyang gikaon nga hapit na lang magkumbira kada adlaw. Iya lang labaylabayan ang usa ka makililimos nga si Lazarus nga naglubog na lang sa daplin sa pultahan sa koral sa harianon niyang balay. Si Lazarus nagpaabot lang sa bisan unsang momho o subra nga ilabay gikan sa lamisa sa tawong dato.

Sa paglabay sa panahon, namatay kining makililimos nga si Lazarus ug gidala sa mga anghel ang iyang kalag ngadto sa sabakan ni Abraham didto sa langit.

Sa mao gihapong panahon, namatay kining tawong dato ug gilubong. Ug didto sa imperno ang iyang kalag nag-antus sa kalayo ug asupre sa walay katapusang pag-antos. Gikan sa nahimutangan niya sa imperno, nakita niya sa halayo sa langit si Abraham ug sa sabakan niini si Lazarus.

Sa pagkakita niya niini, misinggit siya ug nagpakiluoy, "Amahang Abraham, maluoy ka kanako nga nag-antus sa kainit sa kalayo. Magsugo ka kang Lazarus nga ituslob ang tumoy sa iyang tudlo sa tubig aron pabugnawan ang akong dila."

"Anak," tubag ni Abraham, "hinumdomi nga sa tibuok mong kinabuhi nakadawat ka sa mga maayong butang, mga lamian nga pagkaon ug mga mahalong pamiste. Ug sa maong paagi si Lazarus nakadawat sa mga dautang butang ug ania karon siya gilipay dire sa langit samtang ikaw gipaantus diha sa imperno.

"Gawas pa niana, dunay usa ka bung-aw nga nag-ulang kanato aron ang gikan diri dili makaanha diha ug ang gikan diha dili makaari dire."

"Kun mao kana Amahan nga Abraham," nagpakiluoy gihapon ang dato," "sugoa si Lazarus ngadto sa balay sa akong amahan aron pasidan-an ang lima ko ka  mga igsoong lalaki aron dili sila makaari sa imperno."

"Tua didto ang mga propeta ug mga sulogoon sa Dios aron ilang paminawon," tubag ni Abraham.

"Dili na ingon niana Amahan nga Abraham, apan kun dunay moadto kanila nga gikan sa mga patay, mahimong maghinulsol

  sila."

"Kun dili sila maminaw sa mga propeta ug mga sulugoon sa Dios didto, dili gihapon sila magpatalinghog kun dunay mabanhaw gikan sa mga patay." (Kataposan)