Dughang samaran

Wa nay kinabuhi si Nestor sa diha nga napalgan siya sa iyang asawa nga si Teresita nga nag-buy-od sa kama sa ilang lawak.

Naghikog siya ginamit ang usa ka mahait nga punyal nga maoy iyang gilaslas sa iyang pulso. Aron gayod iyang maangkon ang iyang hinanali nga kamatayon nag-inom pa gayod siya og malathion.

Diha sa kilid ni Nestor, si Teresita may nakit-an nga ballpen ug sulat. Iyang gipunit ang sulat ug gibasa.

Mahal kong Teresita,
Seguro patay na ako sa di mo  pa mabasa kining hamubo kong sulat. Apan napugos ako sa pagbuhat sa ingon, bisan kun supak sa akong kabubut-on, kay di ko na maantos ang kasakit ug kala sa imong kalampingasan ug pagka maluibon. Oo, nahimo akong inutil human madisgrasya sa motorsiklo nga akong gimaneho diha sa kadalanan. Gumikan sa maong hitabo, dili na usab ako makahatag kanimo sa lawasnong kalipay. Human sa maong disgrasya dili na ako makagakos kanimo og hugot ug mopabati kanimo sa mainit nga dinagaang sa akong pagmahal kanimo. Ug dili mo na mabati ang mainit kong mga halok.

Apan bisan pa niana dili kana igong katarongan nga imong wataswatason ug gilisgilison ang akong dughan sa tumang kabanyaga. Dili kana igong hinungdan nga makigduwa ka og kalayo uban ni Pare Boy diha sa kaugalingon tang lawak sa matag karon ug unya.

Tingali ug nagtuo ka Teresita nga sabton ta ra ka niining dakong salaod nga imong nabuhat batok sa atong kaminyoon.

Wa akoy igong kaisog ug kusog nga mosabot sa imong pakiglambigit uban ni Pare Boy, Teresita, kay sa mga higayon nga makita ko kamo si Pare Boy nga manulod sa kaugalingon tang lawak, daw mohuot ang akong dughan ug daw adunay daghang mahait nga punyal ug talinggab nga motusak-tusak sa akong kasingkasing.

Dili lalim Teresita kun ang babaye nga imong gimahal pag ayo atua na mosapigad ug mag pauraray sa mga bukton sa labing suod mong higala.

Apan ayaw kabalaka Teresita, bisan pa kun imong masayran nga  way nalilong kanako mahitungod sa inyong pagluib kanako.

Kay hatagan ko na kamo og kagawasan sa pagtagbaw sa inyong  lawasnon nga kalipay. Karon nga wa na ako ning kinabuhia.

Daghang Salamat.

Nagmahal kanimo sa kanunay,
Nestor

Daw bata nga mingaab sa paghilak si Teresita gumikan sa iyang pagbutyag sa matuod niyang gibati ngadto kaniya. Gumikan sa tumang kasubo, kalit nga nagminatay si Teresita. Apan kawang lamang ang iyang pagbakho ug pagdanguyngoy kay ang tawo nga iyang giluiban ug gisakit patay naman. Ulahi na ang iyang pagbasol. (Kataposan)