“Incubus”

Gula  70

Sa sinultihan ni Bradley, nakasabot ko nga gusto gyud niyang gub-on ang malinawon ug malipayong pagpuyo namo ni Dirk.

“Hangyoon ko ikaw, Bradley,” giingnan ko siya. “Ayaw samoka ang pagpuyo namo ni Dirk. Malipayon na kami sa among kaminyoon.”

“Dili ko magsamok sa inyong kaminyoon, Ingrid,” ni Bradley pa, “kun hatagan mo usab ako og panahon.”

“U-unsay buot mong ipasabot?”

“I can be a nice lover boy if you want me to, Ingrid.”

“Damn you, Bradley. Dili ingon niana ka barato ang akong pagka babaye.”

“I know. Mao bitaw nga dako kaayo ko’g interes nimo.”

“Kun dili ka mohunong pagsamok nako, itug-an ko ikaw ngadto kang Dirk. Sultihan ko siya sa imong pagbinastos nako.”

“Sige, buhata kana, Ingrid, aron ikaw mismo ang maghaling og kagubot sa inyong pagpuyo.”

Wala dayon ko makatingog. Sa makadiyot akong gihinuktokan ang ulahing gisulti ni Bradley. Ug natugkad ko nga may point siya.

“Gamay rang panahon ang akong pangayoon nimo, Ingrid,” matud ni Bradley. “Usa ka gamay nga pabor.”

“I’m sorry, Bradley,” ingon sa nakabaton ko’g kaisog aron prangkahan siya. “Dili ko makahimo pagbudhi sa akong bana. Gawas pa, wala ko mahigugma nimo. Wala koy pagbati alang nimo bisan gamay na lang. Kun nakagusto pa ko nimo, ikaw untay akong gipakaslan ug dili si Dirk. Busa, hinaot nga makasabot ka.”

Unya gidali nako’g putol  ang pagnagsulti namo ni Bradley dihang mitingog ang buzzer sa pultahan sa lawak nga nahimutangan namo ni Dirk sa hotel. Nagtuo kong si Dirk na ang nahiabot gikang nagpalit og newspaper. Dili ko buot nga maabtan ko niya nga nakigsulti kang Bradley sa cellphone. -- Sumpayan pa