"Incubus"

Si Dirk wala na magkinahanglan og agda. Kadali ra siyang nakamatikod sa pagsaka sa level sa akong libido. Mi-penetrate dayon siya. Unya among gitambayayongan pagkatkat ang kinapungyan sa himaya sa ikapitong langit. Naangkon namo ang hingpit nga katagbawan sa among gibuhat nga sulundong ritwal sa gugma.

Sa wala pa mi mangatulog, mi-score pag-usab si Dirk. Mas mainiton, mas tugob sa sensasyon ug mas makahuloganon ang among pagpinarayganay. Bisan bugnaw kaayo ang sulod sa lawak tungod sa aircon apan gipaningot mig maayo. Ingon sa nahurot ang tanan kong kusog dihang nagkadungan mig sangko sa kinapungkayan sa kalalim mao nga nakatulog dayon ko pagkahuman nga wala na gani makasul-ob sa akong undies.

Pagkaugma, nagkasabot mi si  Dirk nga dili una manglakaw. Gusto namong gastohon ang mga takna sulod sa hotel nga among giistaran aron makarelaks. Nagpa-room service lang gani mig pamahaw. Human makakaon, gipahungaw na usab namo ang kainit sa among mga pagbati ngadto sa usag-usa. Walay pagkapuol namong gisaw-an pagtagay ang kalalim sa lawasnong kalipay. Gipahimuslan namog maayo ang privacy nga among naangkon sulod sa mabugnaw nga lawak sa hotel.

"Mogawas una ko, Sweetheart," nananghid si Dirk human sa among lovemaking session nga tugob sa sensasyon.

"Asa ka man?'' Gipangutana ko siya.

"Mopalit  og newspapers aron duna tay mabasa-basa dinhi. Aron ba sab dili ta maulahi sa kasayoran kun unsa nay nahitabo sa atong nasud karon.''

Dihang nakalakaw na si Dirk, misulod ko sa banyo aron maligo. Serad-an na unta nako ang pultahan sa banyo dihang mibagting ang akong cellphone nga nahimutang sa lamesita. Migawas ko sa banyo aron pagsusi kun kinsay nanawag sa akong cellphone. Kalit lang kong gikulbaan dihang akong gitamdan ang mga numerong mi-reflect sa screen. Wala kini marehistro sa akong phonebook. Pero dili mahitabong masayop  ko. Numero kini sa cellphone nga gigamit ni Bradley. (Sumpayan pa)