Sukli sa utang

(Gula 16)

Gipasabot ko’g maayo si Davon nganong nagdumili ko pagdawat sa iyang gugma. Gitug-anan ko siya sa tinuod nga uyab nako si Rolando ug nga sa iyang kamatayon, daw nalubong uban kaniya ang akong kasingkasing. Nga dili pa ko andam mahigugma pag-usab.

“Wa pa ko maka-move on, Davon,” giingnan ko siya.

“Tabangan tikaw nga maka-recover sa masakit mong kasinatian sa gugma, Editha,” nagkanayon si Davon.

“Ang gusto ko mao ang peace of mind. Busa, please...ayaw una ko’g samoka. Mahimo ba, Davon?”

Sukad niadto, wala na gyud mopadayon si Davon sa pagpangulitawo nako. Sa mga higayon nga magkasugat ug magkaduol ma sulod o gawas sa school campus, kaswal lang kaayo ang among pagtinagdanay.

Hangtod nga miabot ang adlaw nga nasikop sa kapolisan ang adik nga maoy gitumbok sa mga nakasaksi nga maoy responsable sa pagpatay kang Rolando. Niini, hingpit na gyud nga miislag si Davon kanako.

Hinuon, wala ko maapektohi sa gihimo niyang paglikay nako. Wala koy pagbati ngadto niya bisan gamay na lang. Si Rolando pa gihapon ang tag-iya sa akong kasingkasing bisan patay na siya.

Miabot ang adlaw sa gradwasyon. Usa ko sa malamposong mga estudyante nga nakagradwar sa high school. Bisan wala na si Rolando nga mipasalig pagtabang nako nga makapasar sa trigonometry subject nga gi-handle sa iyang amahan nga maestro, nakapasar ra gihapon ko sa maong subject bisan sa akong kabugo sa mathematics.

Kay tingbakasyon na man, akoy kanunay mahibilin sa among balay. Ang akong mga ginikanan busy sa pag-atiman sa gamay nilang negosyo sa downtown sa Iriga City. Gabii na silang mopauli sa among balay. Ang tulo sab nako ka maguwang dili gyud magpuyo sa balay. Laagan sila kaayo!

Gibati ko ang kalaay nga kanunay lang mag-inusara sa balay. Gipul-an na ko sa pagbasa og pocketbooks, tan-aw og TV ug pagpaminaw og musika sa FM stations sa radyo.

Usa ka palis niana, samtang nagtan-aw ko’g salida sa TV sa may sala, may nanuktok sa pultahan. Mitindog ko aron ablihan ang pultahan. Nakugang ko dihang natukas na ang palid. Wala ko magdahom nga siya diay ang akong bisita niadtong higayona. – Sumpayan pa