Sukli sa utang

Gula 13

Sa hilom nakonsensiya ko  sa akong pagpamakak ngadto kang Mama Clemencia. Nagdahom gyud intawon tingali ang akong inahan nga tinuod ang akong gipatuo kaniya nga gikakita nako sa simbahan ang akong mga klasmet ug nakigpanuroy sila uban nako.

Wala lang intawo’y kasayoran ang akong inahan nga si Rolando ang akong gikauban kaganina. Ug wala kami manuroy kun dili naglublob hinuon sulod sa mabugnaw’ng lawak sa usa ka motel.

“Panihapon na,” giingnan ko ni Mama. “Nahuman na mi’g pangaon ni Papa mo.”

Mibiya ko sa atubangan ni Mama ug misulod sa akong lawak. Nag-ilis ko. Pagkahuman, migawas ko sa kuwarto ug miadto sa kosina. Nangukab ko sa mga kaldero aron pagsusi kun unsay makaon. Nanihapon ko.

Human makakaon sa nalangan nga panihapon, gihipos ko ang akong mga kinan-an ug nanutbras. Pagkahuman, gipalong nako ang suga sa kosina aron mobalik na sa akong lawak.

Pero sa nagdanga-danga na ko sa sala, kalit lang kong gikulbaan. Nakita man god nako si Papa Augusto nga naglingkod sa sopa samtang nagtan-aw og salida sa telebisyon. Wala pa mi magkasulti si Papa sukad sa akong paghiabot kaganina. Kini laging sad-an ta, morag tulisokon ta sa atong konsensiya kun makita nato ang tawo nga atong nasad-an.

Alang god nako, usa ka dakong sala nga akong nabuhat ngadto sa akong mga ginikanan ang akong pagtugyan sa akong pagka babaye ngadto ni Rolando sa dili pa tukmang panahon.

“M-maayong gabii, Pa,” gitimbaya ko si Papa sa dihang nahiduol na ko kaniya.”

“Maayong gabii sab,” mubong tubag ni Papa Augusto.

Miamen ko sa kamot ni Papa. Pagkahuman, milahos na ko’g sulod sa akong kuwarto. Nakapasalamat ko sa hilom nga wala na mangusisa ang akong amahan kun nganong nagabhian ko pagpauli. Tingali, gisultihan na siya ni Mama Clemencia mahitungod sa akong alibi.

Pagsulod nako sa akong kuwarto, gitangtang nako ang mga salimbong sa akong lawas. Nag-panty na lang ko. Dili ma god ko makatulog kun may daghang salimbong ang akong lawas. Naanad ko nga mag-bra ug panty lang kun matulog kay presko ang akong pamatyag.

Pagkaugma sayo kong miadto sa eskuylahan. Nakugang ko’g maayo dihang maoy misugat nako ang daotang balita; patay na si Rolando. -- Sumpayan pa