Dili mamatay ang kagahapon

Gihigugma ni Sandra si Roel sa tibuok niyang kasingkasing. Alang kaniya, wala nay laing lalaki sa kalibotan. Dili siya sama sa ubang babaye nga nagbaton og daghang hinigugma. She is a one-man woman.

Dili niya gusto ang nahitabo sa iyang higala nga tungod sa pagsige niini nga nahigugma sa pipila ka mga lalaki, nabuntis taliwala nga batan-on pa kaayo. Matud pa sa uban, nagabaan kay nagbaton man kini’g daghang lalaki sa iyang kinabuhi.

Apan, dili kaayo taas ang ilang paghigugmaay kay sa pipila ka bulan, milarga si Roel sa Amerika kay ang iyang mga ginikanan, maoy nagsugyot kang Roel nga sa Amerika na lang siya magpadayon sa pagtuon.

"Maayo didto sa States kay sikat ang tawo kun adto didto mag-eskuwela," kausa pulong sa iyang Papa. "Ang buhaton mo, adto ka lang mopuyo sa imong Tiya Loling. Maayo didto kay dalaga man kadto ug kanunay wala siya’y kauban sa iyang balay."

"Unya, Pa, dili ba estrikta man kuno kadto si Tiya Loling," pulong ni Roel samtang sila nag-estoryahanay sa wala pa siya molarga sa States.

Mao kadto human mahikay ang iyang papeles, gitakda dayon ang iyang paglarga sa Amerika. Ning iyang paglarga ni Roel, dili matukib ang kaguol nga gibati ni Sandra. Mas maayo pa lang kun wala niya dawata ang gugma ni Roel aron dili unta siya maguol. Ug sa ilang pagsultihanay...

"Sandra, kining akong gibuhat, alang ra kini sa atong kaayohan. Salig kanako akong isaad kanimo nga dili ako malimot sa atong mga saad ug panumpa," ni Roel samtang gihagkan niini ang mga ngabil sa hinigugma. "Hinaot nga sa akong pagbalik, dili ikaw mausab Sandra. Ikaw lang ang babaye sa akong kinabuhi."

"Gisalig ko kanimo ang kaugmaon sa atong gugma, Roel," pulong ni Sandra. Magpaabot ako sa imong pagbalik. Bisan unsa kadugay, paaboton ko ikaw."

Didto sa Amerika, nagpadayon si Roel sa iyang pagtuon. Ug sukad sa pagpuyo ni Roel sa States, halos adlaw'ng tanan, dili mapala ang ilang pagtinawagay pinaagi sa selpon, ug sa matag text nila, daw walay pagka-usab ang ilang mga saad ug panumpa. Alang kang Sandra, morag naa ra duol si Roel ug mao usab si Roel nga morag duol ra usab si Sandra kaniya. Mao kini ang ilang panaghigugmaay nga sa ilang pagtuo, walay mahitabo nga  kakulian.

Apan, paglabay pa gayod sa mga katuigan, namatikdan ni Sandra nga morag mibugnaw si Roel kini dihang ang panahon nga hapit nang makatapos si Roel sa iyang pagtuon. Ang kaniadto nga pagtext, halos mahanaw na. Hangtod nga miabot ang panahon nga daw bola, nahanaw usab sila sa isig nila ka panumdoman.

Nanglabay ang mga katuigan sa ilang pagpakahilom. Nakat-on si Sandra sa paghigugma sa laing lalaki. Miabot sa iyang kinabuhi si Ramil sa pagtuo nga dili na gayod magkasugat pa ang ilang mga dalan.

Apan, pagka mubo ra kaayo ang panahon sa kinabuhi ni Ramil. Tulo lang ka adlaw human sila makasal, nabangga kini sa motor nga iyang gisakyan. Hapit maguba ang kalibotan ni Sandra. Buot na lang gani niyang matapos ang iyang kinabuhi kay puslan nga nahanaw si Ramil.

Duha ka tuig ang milabay, human sa kamatayon ni Ramil, usa ka adlaw, nakadawat og balita si Sandra nga kuno taliabot si Roel gikan sa Amerika ug human sa maong balita, kalit lang mibutho si Roel. Dili na gani unta gustong makig-atubang pa si Sandra kay morag wala na siya’y nawong pa nga makig-atubang pa sa kanhing hinigugma. Apan, mapugsanon si Roel. Nangayo pa man gani kinig pasaylo ug iyang gisultihan si Sandra sa hinungdan nganong nagpakahilom siya sa daghang   mga tuig. Matud pa ni Roel, nga human siya makatapos sa pagtuon, buot na gani siyang mopauli apan, nagkasakit siya. Maayo na lang kay gihatagan pa siya’g higayon nga magkita sila pag-usab.

"Dili mahimo nga bangonon nato ang atong kagahapon tungod  kay dili na ako kanimo," matud ni Sandra. "Naminyo na ako ug wala nay kahigayonan nga mahigugma ako pag-usab."

"Nasayod ako sa nahitabo kang Ramil busa nagtuo ako  nga pagbuot kini sa Diyos aron pinaagi niini manumbalik ang patay na unta natong kagahapon," pulong ni Roel. "Busa, dili pa ulahi ang tanan tali kanato. Gihigugma ko ikaw, Sandra. Husto na ang matag nato ka panuigon aron magpuyo kita samtang kita may kinabuhi."

Gihagkan ni Roel ang mga ngabil ni Sandra nga kaniadto, nagpaabot kaniya. Wala makabalibad si Sandra ug niadtong higayona, daw gianod si Sandra sa bul-og sa pinitik sa ilang kasingkasing. Pulong ni Roel, tinuod gayod nga dili mamatay ang usa ka kagahapon. (Kataposan)