Pinitik sa kasingkasing

Sa unang higayon gibakyaw ni Don Manolo ang iyang mga kamot ug iyang gilaparo si Vivian ang bugtong niyang anak. "Masupilon! Hayop ka ug way igabawos," matud pa ni Don Manolo nga nagpaminte sa tumang kasuko.

"Oo, papa gikan ako kanimo ikaw ang nagbuhi ug nagpadako kanako. Tungod niana mahimo mo akong patyon ug bilanggoon sa tibuok nakong kinabuhi. Apan wa kay katungod pag bilanggo sa pinitik sa akong kasingkasing," matud pa ni Vivian dungan sa pagbakho ug pagdanguyngoy.

"Kinahanglan nga praktikal na kita niining panahona karon Vivian. Kinahanglan nga gamiton ta na ang atong sentido komon. Ambongan ug sapian si Nestor gawas sa i yang pagka doctor. Siya ang akong nakita nga alang kanimo ug dili kadtong patay gutom nga si Paeng," matud pa ni Don Manolo nga mipasabot ni Vivian.

"Apan wa gayod ako mahigugma kang Nestor papa. Kay si Paeng mao ang gipitik sa akong kasingkasing. Tinuod dili siya sapian, ambongan ug titulado kay usa ra man siya ka polis. Apan anaa kaniya ang ka mapaubsanon, ka ligdong ug ka matinud-anon. Anaa kaniya, papa ang mga hiyas nga akong gipangita sa usa ka lalaki," matud pa ni Vivian nga wa nay kahadlok nga nitubag-tubag sa iyang amahan.

"Kun mao kana Vivian nga dili ka gyod mopatuo kanako, unsa pay imong gidugayan, layas! Ug ayaw na gayod pagbalik dinhi sa atong panimalay. Salbahis ka ug walay igabawos!" matud pa ni Don Manolo nga nagpangusmo sa tumang kasuko.

Giandam na diay ni Vivian ang iyang malita ug nag paabot og higayon nga makalayas. Ug naabot na gayod ang tukma nga higayon sa iyang paglayas.

Maisogon si Vivian nga nanaog gikan sa ilang harianon nga panimalay bisan pa sa daw ataon nga kangitngit nga mitabon sa ilang dapit. Midiritso siya sa pag-adto sa beach resort sa Bonbon, Aloguinsan, ang dapit nga ilang tagboanan ni Paeng ug nahimong saksi sa ilang way kamatayon nga gugma ni Paeng. Pamasin nga atua didto ang naulahi.

Ang maong beach resort di na mahimong langkaton pa gikan sa mga pako sa iyang handurawan kay saksi kini sa diha nga iyang gitugyan ang iyang pagkababaye ngadto kang Paeng.

"Tingali baya, Love, kun imo lang kong biyaan ug talikdan karon nga imo nang naangkon ang akong pagkababaye," matud pa ni Vivian.

"Dili kana mahitabo, Love, kay ikaw ra ang gipitik sa akong dughan," daling tubag ni Paeng.

Kalit lang nga mibathay sa maanyag nga panagway ni Vivian ang talagsaong kalipay sa diha   nakita niya ang pamayhon sa usa ka tawo nga nasinati niya pag-ayo.

"Love, ikaw ba ka na?" pangutana ni Vivian.

"Oo, Love, ako kini," tubag ni Paeng ngadto kang Vivian daling sugat ug gakos niini sa nahauna.

"Wa na gyoy makapugong sa atong pagminahalay, Love, kay giprangkahan ko na si Papa nga sundon ko ang gipitik sa akong kasingkasing ug dili ang iyang mando," matud pa ni Vivian.

"Daghan kaayong salamat, Love, nga wa mo ako ibaylo sa tinagingting sa salapi ug kinidlap sa bulawan ug imong gipanalipdan ang atong gugma," tubag ni Paeng sa tumang kamapasalamaton.

Unya nisulod sila sa lawak ug didto ila na usab nga gisaw-an ang pagdimdim sa matam-is nga dugos sa himaya. (Kataposan)