Tam-is ang kadaogan

Sukad sa pagkamatngon ko’g buot, pangandoy ko na nga mosilbi sa akong isig ka tawo. "Yamat ra, Clarisse? Angay diay kang sul-oban og medalya!" Kusog nga mikatawa si Shiela, akong bestfriend ug classmate sa college.

"Wa ko magkomedya, Shiela. Gipadako man god ko nilang Mama ug Papa sa value sa pagtabang. Mao bitaw nga Social Worker ang kurso nga akong gikuha. Ikaw, unsa man diay imong purpose sa pagkuha ning kursoha?"

"Aw, ganahan lang ko."

Nagpanglingo ko nga mitan-aw kang Shiela nga mihungit sa hopia nga diha sa iyang platito. Diha kami sa sulod sa canteen sa unibersidad nga among gitunghaan. Miinom ko sa akong softdrinks.

"Bitaw, may katarongan ka, Clarisse. Ang kurso nga atong gikuha para gyod sa pagsilbi sa atong isig ka ingon."

Gitutokan ko si Shiela. Seryoso na siya. Nakapasalamat ko nga nasayod siya sa tinud-anay nga kahulogan sa kurso nga among gikuha.

Third year na ako sa Social Worker dihang gikaila ko si Marlon. Sa laing unibersidad siya nagtungha. Pagka maestro ang kurso nga iyang gikuha. Ambongan siya. Husto sa barog ug panglawas. Anak og adunahan sa negosyanteng mga ginikanan sa Sugbu.

"Nagpasalamat ako nga nagkaila  ta, Clarisse."

"Ngano man?" Wa ko makaharong sa tinutokan ni Marlon nako. Milingiw ko. Tulo na ka bulan niadtong tungora sukad sa among pagkaila.

"Unta di ka makalitan, Clarisse. You know, I am in love with you."

"D-Di pa ko mosulod niana, Marlon. Gusto kong molampos sa akong pangandoy." Gisulti ko kang Marlon ang akong ambisyon.

"Dalaygon ka, Clarisse. Misamot kadako ang gugma ko nimo."

Di ko kalimdan ang akong kaugalingon. Nahigugma sab ko kang Marlon. Apan gibalibaran ko siya sa iyang gugma. Di ko buot nga mahimong babag ang akong gugma kaniya sa akong mga tinguha.

"Ang babaye kun makig-boyfriend, Marlon, may comitment na siya sa lalaki. Mohatag na siyang panahon ngadto sa iyang trato. Di ko gusto nga sa pagka karon mahitabo kini nako. Basig  di ko makab-ot ang akong pangandoy."

"Nakasabot ko, Clarisse. Di na ko magsamok nimo. Panghinauton ko ang imong kalamposan."

Sa unang higayon sa akong kinabuhi, nahigugma ako. Apan gisakripisyo ko kini tungod ug alang sa akong gidamgo sa umaabot. Gihilakan ko sa hilom ang kapakyasan sa mao kong gugma.

Nanglabay ang mga tuig. Milampos gyod ko sa kurso nga akong gikuha. Nakatrabaho na sab ko. Ug malipayon ako nga nakasilbi sa akong isig ka tawo nga nagkinahanglan sa akong panabang isip usa ka Social Worker.

Usa ka gabii, daw way kabutangan sa akong kaugalingon ang gibating kalipay dihang kalit nga mibutho sa among balay si Marlon.

"Nakahuman na ko sa pagka maestro, Clarisse. Nakapasar ko sa board exam. Nagtudlo na ko karon sa mga bata sa usa ka eskuylahan dinhi sa siyudad. Sama nimo, garbo ko sab nga nakasilbi sa mga bata alang sa ilang edukasyon."

Malipayon kaayo si Marlon. Ug niadtong tungora, natawo pag-usab ang  gugma ko kaniya.

"Wa nay babag sa atong gugma, Clarisse."

"Oo, Marlon. Wa na."

Kami rang duha sa among sala. Wa ko makapugong kang Marlon dihang iya kong gihagkan sa mga ngabil. Unya nagkasabot kami nga magpakasal dayon. Katam-is sa kadaogan nga akong naangkon. Gihatag sab sa Diyos si Marlon nako. (Kataposan)