Gula 49
Nakapanglingo ko sa akong nasayran gikan ni Dirk. Mao diay nga wala gayod masumpo ang pornography kay kulang sa kahugot ang kampanya sa kagamhanan batok niini. Gani, bisan usa ka polis ang akong bana apan mi-patronize man siya sa mga pornographic materials.
“Luoy man sab kun among hilabtan ang mga negosyanteng nagbaligyag pornographic materials,” nagkanayon si Dirk. “Panginabuhi god nang ila. Maong pasagdan lang sila namo basta way order sa pagdakop nila. Kun tukion pag-ayo, dili man bangis nga mga kriminal nang mga tawhana, ba. Mas maayo pa nang ilang gibuhat kay sa manulis.”
Wala na ko motubay sa gisulti ni Dirk. Dili kaayo ko interesado sa tema nga iyang gituki. Mihilom na lang sab si Dirk. Gitingob niya ang iyang atensiyon sa pagmaneho sa sakyanan nga among gisakyan.
Pag-abot namo sa balay, gitestingan dayon ni Dirk ang x-rated films nga iyang napalit. Iya sab kong gipatan-aw. Tugob sa kainit ang mga eksena sa salida. Madala gyud ka sa kainit sa pagpinarayganay sa duha ka protagonista.
Dihang morag naanod na sab si Dirk sa kanindot sa salida nga among gitan-aw, iya kong giagda nga mosulod mi sa among kuwarto. Nakasabot ko kun unsay diha sa iyang hunahuna. Gipaundayonan ko siya. Ug didto sa sulod sa lawak namong magtiayon, among gisaw-an pagtagay ang dugos sa lawasnong kalipay. Tugob sa kainit ang among lovemaking nga dinasig sa among nakita sa x-rated film nga among gitan-aw.
Nakadugang tuod sa kanindot sa among sex life ang x-rated films nga among gitan-aw. Wala namo isipa nga kini usa ka pornography kondili usa ka work of art. Educational man sab ang maong salida kun tugkaron nimog maayo.
Tulin nga nanglabay ang mga adlaw. Mitangkod nang usa ka tuig ang kaminyoon namo ni Dirk. Apan wala gyud ko momabdos. Nahisagmuyo na si Dirk kay gibuhat na namo ang tanang paagi aron magsabak ko apan napakyas ang tanan. Padayon kong gibisita sa binuwan kong regla. -- Sumpayan pa