Ang kasilyas sa VIP bar

Tungang gabii. Samtang nagkalingaw ang mga bartenders og preparar sa mga order sulod sa VIP bar nga usa ray pultahan apan adunay kaugalingong kasilyas, misulod si Mr. Harry Sega, ang captain waiter sa laing outlet. Nakita nila kining nagdali nga misulod sa nag-inusarang confort room (CR).

Si Vino, kinsa maoy pirmeng mahabilin sa counter, nakamatikod nga milabay na lang ang usa ka oras, wala man lang gihapon mogula si Mr. Sega gikan sa CR. May nahitabo kaha? Unya naigking siya dihang mikiring ang telepono dinha sa iyang atubangan. Iya kining gipunit. "Yes, VIP BAR, hello! May I help you?"

Taga pikas outlet diay ang nanawag. Nangita ni Mr. Sega kay dunay importanteng papeles nga papirmahan. Tayming ang pagbutang ni Vino sa telepono kay mao poy pag-abot ni Beboy, kauban niyang bartender. Gihangyo na lang niya kini: "Boy, gipangita na si Mr. Sega sa iyang balwarte. Palihug na lang og tuktok sa CR, bi."

Daw buotang karnero si Beboy nga misunod. Dali niyang giduol ang CR. Dihang tuktokon na unta niya ang pultahan, nadungog niya nga may mibarog didto sa sulod ug gi-locked ang palid. Wala na lang mopadayon si Beboy. Basig wala pa mahuman si Mr. Sega ug makasuk-an hinuon siya. Igo na lang niya kining gisangpit ug giingnan: "Sir, may urgent call ka sa Fortune Bar."

Apan milabay na lang ang 30 minutos, wala man lang gihapoy Mr. Sega nga migula? Nakunot na’g maayo sa kahibulong ang agtang nilang Beboy ug Vino sa pagpinaabot sanglit kaduha na manawag ang pikas bar kay nagpalo-ap asa na ang ilang kapitan? Gumikan niini, nausa ang hunahuna sa duha ka bartenders: Ilang tuktokon pag-ayo ang pultahan ug kun serado man, ila kining ablihan.

Gikuha ni Vino ang yawe didto sa butanganan ug nagdungan silang Beboy pag-adto sa CR. Unya dihang dinha na sila atubangan sa palid, gisulayan ni Bino pagliso ang seradora. Nahasiga ang ilang mga mata kay abiyerto man diay kini. Ug labaw pa silang natiurok sa ilang gibarogan dihang sa pagbukas nila, wala na diay tawo ang sulod sa CR.

Taudtaod, nanawag ang taga Fortune Bar. Si Vino ang nakatubag ug gipahibalo nga: "Vin, napirmahan na ni Mr. Sega ang papeles. Mao pa lang gyo’y iyang pag-abot diri. Pero ingon siya, wala man siya mosulod diha sa CR sa inyong VIP bar. Didto siya sa stockroom sa silong kay nagtsek-ap unsa nay status sa mga supplies sa hotel nga angay nang i-refill, o orderon sa gawas in advance."

Daw misiyok ang mga dalunggan ni Vino sa maong pahibalo. Wala makatingog. Naamang ... nga nagsige’g pangutana sa kaugalingon: "Kun di to si Mr. Sega ang akong nakita kaganina nga misulod sa among CR, kinsa man diay kadto?" (Kataposan)