Mingaw kaayo ang VIP room sa usa ka balay-sugalan kay walay mga puntos nga midula. Duruha ra ka card dealers ug usa ka Pitboss ang nagtikawtikaw. Puro wa ganahi moistorya. Kay sa nangaging gabii god, dihang saba kaayo ang maong dapit, kalit lang gilamba ang palid sa maong lawak nga ambot kinsa kahay naghimo sanglit wala man silay tawong nakita.
Ikaduha, ang naasayin sa lamesa dili parehang Sebwano. Si Cris taga Cebu samtang si Ivy usa ka Tagala, bag-o pa ug ning gabhiona pa magsugod pagtrabaho. Gikan si Ivy sa Main Office sa Manila ug segun pa sa mga huhungihong may Third Eye kuno kini siya -- ang pagkadali ra gyod makakita sa mga linalang nga dili sama nato.
"Cris, aduna lang unta koy ipangutana?" Kaantigo mosultig binisaya si Ivy tungod kay iyang Papa taga Davao samtang ang iya rang Mama maoy taga Cavite.
"Unsa man kana, Ivy?" Daling sawo-sukna ni Cris nga mitutok sa babaye, kinsa naglingkod sa iyang atbang.
"Aduna bay Pitboos dinhi nga Insekon pero moreno ang pamanit, magsul-ob og abuhon nga amerikana, unya manigarilyo samtang nagdalag usa ka tasang kape dinhi sa atong area?"
"Oo, aduna. Si Sir Harry Games." Otomatik nga tubag sa lalaki. Sanglit ang deskripsyon nga gihulagway ni Ivy tukma man gyod kaayo sa pamayhon sa maong opisyal. "Pero ... dugay na man siyang namatay. Nganong nangutana man ka, Ivs?"
"Naa siya karon sa imong luyo, oh." Ni Ivy pa nga mitudlo sa iyang simod.
Ang lubot ni Cris morag gituslok sa dagom. Naigking sa gisulti sa kauban. Ug wala kapugong sa pagpanindog sa iyang mga balhibo. "U...unsa man ang iyang gibuhat?"
"Nagtan-aw sa palibot samtang nagtangag og sigarilyo ug nagdalag tasa sa kape. Pero walay angay'ng kahadlokan." Alam-alam sa tsinitang Tagala. "Kay silang mga espiritu nga anaa dinhi mga maayo. Dili mga maldito. Sagad nila mga empleyado sa atong kompaniya ug mga kliyente nato nga hagbay dang nangamatay pero tungod tingale kay mingawon sila ning dapita, mao nga usahay mobisita sila."
Si Mr. Felo Mono, kinsa maoy ilang Pitboos nga nadestino niining gabhiona misulay pagsubay sa gitugpahan sa panan-aw ni Ivy. Apan wala gyod siyay nakita. Nahadlok na lang pod siya sagol tumang katingala sama sa gibati ni Cris.
Sukad niadto, magpanuko na si Cris ug si Mr. Mono nga makauban si Ivy sa ilang area, ilabi na sa VIP room nga nabaniog nang dapit nga taw-an. Nahadlok sila nga basig unsa na pod unyay makita niini, diin igo na lang manglimbawot ang balhibo sa ilang tingkoy kay dili man gyod sila makakita sa nakita sa dalaga. (Kataposan)