Labing dakong gasa

Dihay kasina nga milakra sa alimpatakan ni Piolo samtang ang trak de pasahero nga iyang gisakyan diha sa Cebu City South Terminal milarga na padulong sa habagatang bahin sa lalawigan sa Sugbu.

Tataw ug klaro kaayo nga nasina siya sa dakong kalamposan nga naangkon sa iyang mga igsoon.

Tulo sila ka igsoon ug siya ang kinamagulangan ug labing kabos. Si Mark nga maoy nagsunod kaniya usa na ka malamposong doctor ug hilabihan ka bahandianon. Gumikan sa iyang katakos sa pagpanambal adlaw ug gabii mapuno gayod ang iyang klinika sa mga pasyente.

Tungod niini, daghan siyag mga mahalong awto nga napalit. Nakapalit usab siyag daghang kabtangan ug kayutaan.

Hilabihan usab ka malamposon si Dawn, ilang kamanghoran nga usa ka registered nurse. Atua kini magtrabaho sa Amerika ug adunay dako nga sweldo. Dugangan pa sa iyang bana nga usa ka kapitan sa barko sa gawas. Tungod kay mag abot man ang dolyar nga ilang kinitaan, nahimo silang labing dako sa ilang dapit.

Kun itandi ni Piolo ang iyang kahimtang batok sa duha niya ka mga igsoon mora ra siya og nagtandi sa bulawan ug basura.

Kay wa man siyay kurso nga nahuman. Wa usab siyay balay. Usa ra gani ka parisan ang iyang sapatos ug kanunay lang siyang magkaon og utan ug ginamos gumikan sa kawad-on.

Si Piolo nangalagad sa Diyos human mapakyas sa una niyang gugma. Si Christine, ang matahom niyang classmate ug unang babaye nga nakapapitik sa iyang dughan naminyo og usa ka bahandianong magpapatigayon.

Si Piolo nga usa ka pastor wa gyod moasenso kay nagsalig ra kini sa grasya sa Diyos. Nagsalig ra kini sa mga tithes and offerings sa mga sakop sa iyang gamay'ng pundok sa mga kristohanong magtotoo.

Apan ang nihulma nga kasina sa iyang handurawan kalit lang gipulihan og kaguol ug kaluoy.

Oo, mga bahandianon ang iyang mga igsoon. Anaa kanila ang gahom ug kabantog gumikan sa ilang kwarta.

Gumikan sa ilang kwarta mapalit nila ang tanang butang. Gawas lamang sa espirituhanong butang.

Gumikan sa naghingaping pangandoy nga madato pag ayo si Mark nahimo usab siya nga abortionist. Daghan ang kinabuhi nga iyang gikutlo diha sa tagoangkan sa mga inahan apan di asawa.

Ang bugtong usab niyang anak lalaki nagumon sa drugas. Si Dawn usab ug ang iyang bana nagkabulag gumikan sa garbo ug ang ilang mga anak nabilanggo kay  nahilambigit sa kaso nga pagpanglugos.

Bisan tuod si Piolo ug ang iyang kapikas way balay nga kasak-an. Pipila lang kabuok ang iyang mga sapot ug sapatos. Ug kanunay lang siyang magsuwa og ginamos, luyo niining mga kalibotanong mga kakulangan, anaa gihapon kaniya ang kalipay kay anaa man si Kristo sa iyang dughan. Hugot siyang nagtuo nga iya gayod nga maangkon ang kalipay nga dayon kun wa na siya ning kinabuhi. Kanunay'ng gisinggit sa iyang kalag nga iyang mapahimuot ang Diyos sa tanang gutlo sa iyang kinabuhi.

Tungod niini, iyang gibati nga mas bulahan siya kay sa iyang mga igsoon, kay anaa man si Kristo sa iyang dughan.

Ang pamalandong ni Piolo nahunong sa dihang gipahinumdoman siya sa konduktor, "Nia na ta sa lungsod sa Aloguinsan, Sir asa man ka manaug?" pangutana sa konduktor kaniya.

"Ihunong lang ko tungod sa bay ni Rief Cimafranca sa Bonbon, brod" tubag ni Piolo. Si Piolo maoy bag-ong pastor nga gibutang sa maong dapit aron sa pagpangabig og mga kalag nga iyang madala ubos sa tiilan ni Giinoong Jesus. (Kataposan)