“Incubus”

Gula 32

Gisuhid gyud namo ang merkado sa Carbon ug Taboan pagpangita sa tanang kinahanglanon ni Ingko Honorio sa paghingilin sa giingon niyang tagulilong nga nagpuyo sa among balay. Nalukop gyud namo ang kamerkadohan. Kadali ra namong nakompleto ang lainlaing matang sa prutas nga iyang gikinahanglan. Ang lisod kaayong pangitaon mao ang lainlaing mga gamot ug dahon sa mga tanom nga isagol sa palina.

Dihang nakompleto na gyud ang tanan, namalik dayon mi sa bukirang dapit sa dakbayan sa Sugbu. Pag-abot namo sa balay, nahuman nag buhat ni Ingko Honorio ang halaran. Gitugyan namo kaniya ang paghikay sa tanang kinahanglanon kay siya man ang nasayod kun unsaon kadtong maong gipalit nga mga prutas, gamot ug dahon sa mga tanom. Nagpaabot lang mi kun unsay iyang ipabuhat namo.

Untop alas tres sa kahaponon gisugdan  ni Ingko Honorio ang ritwal sa paghingilin sa tagulilong nga nagpuyo sa among balay. Iyang gipahimutang ang mga prutas ibabaw sa gihimo niyang halaran. Sa ubos nga bahin sa halaran gipahimutang niya ang palina nga nag-aso. Pagkahuman, mihapa siya sa tiilan sa halaran ug miyamyam sa mga pulong nga wala namo hisabti. Unya, mibarog siya ug gidupa ang iyang mga kamot. Nagpadayon siya pagyamyam. Gipiyong niya ang iyang mga mata.

Sa misunod nga mga gutlo, gipunit ni Ingko Honorio ang gisudlan sa palina nga nag-aso ug milibot siya sa balay. Walay timik kami si Dirk nga nagsunod sa tigulang nga tambalan. Iyang gipaasohan sa palina ang palibot sa balay. Pagkahuman, maoy iyang gipaasohan og sunod ang sulod sa balay. Gitagsatagsa niya pagsulod ang tanang lawak sa balay. Gipaasohan niya sa palina ang tibuok balay.

Human sa pagpaaso sulod sa balay, mibalik si Ingko Honorio sa luyo sa balay diin didto nahimutang ang halaran. Gibalik niya’g pahimutang ang gisudlan sa palina sa tiilan sa halaran. Mihapa na usab siya sa yuta ug miyamyam. Kusog ang iyang tingog. Nanglimbawot ang akong mga balhibo dihang mihuros ang bugnaw nga hangin. Unya, daw mikurog ang yuta nga among gitumban. -- Sumpayan pa