“Incubus”

Gula 31

Mainiton kaayo ang romansa namo ni Dirk. Unya dihang na-sense na niya nga basa na kaayo ang harden sa himaya, iya dayon kining gitisokan sa iyang igluluyong. Sa sangi sa akong handurawan nakita ko ang usa ka bitin nga misulod sa usa ka lungag sa bato. Migakos ko’g hugot ni Dirk dihang natugkad na niya ang giladmon sa lungag.

Ang naandang lihok sa lalaki sa pagpakigtagay sa kalipay uban sa usa ka babaye gihimo dayon ni Dirk. To and fro ang drama sa engkantong pawot og ulo nga binuhi ni Dirk. Sa pagsubli-subli niya sa maong lihok, gibati ko ang naghingapin nga kalalim. Hangtod nga nagdungan mi’g sangko sa kinapungkayan sa katagbawan.

“Hinaot unta nga molampos si Ingko Honorio paghingilin sa tagulilong nga nagpuyo sa atong balay aron wa na tay problema,” matud ko dihang inanay nang mihunas ang gibati kong kakutas human sa mainitong panagsangka namo ni Dirk sa kama.

“Mag-ampo ta nga molampos siya,” ni Dirk pa. “Abi mo, hangtod karon may kalibog pa ko. Dili man god ko motuo kaniadto nga may mga binuhat nga dili makita dinhi sa kalibotan. Pero niining nahitabo kanato karon, inanay na kong nakombinser.”

“Walay mawagtang sa atong pagkatawo kun motuo ta niini, Sweetheart. Tingali matawag kitang aberrant kun ibase sa edukasyon nga atong nabatonan. Pero nahitabo gyud ang daw dili katuohan. Mga butang nga dili ikapasabot sa siyensiya. Ang uban tingaling tawo moingon nga usa kini ka superstition. Pero para nako, I have nothing to lose kun modangop ko sa maong pagtuo. Ang mahinungdanon alang nako karon mao nga makalingkawas na kita gikan sa suliran nga mihamok nato.”

“Mao usab kanay akong gitinguha, Sweetheart, maong misugot ko nga mokonsulta kita sa usa ka tambalan. Manghinaot tang mosalir ning atong gibuhat.”

Pagkaugma, sayo ming milugsong sa kinapusoran sa siyudad. Gibiyaan lang namo si Ingko Honorio nga naghimo’g daw halaran sa luyo sa among balay. Gipamalit namo ang tanan niyang gikinahanglan aron paghingilin sa tagulilong nga nagpuyo sa balay. Dugay namong nakompleto ang mga butang nga iyang gipapalit kay ang uban pangitaonon kaayo. -- Sumpayan pa