“Incubus”

Gula 30

Abtik nga milihok si Dirk. Migawas dayon siya sa pultahan sa among lawak. Misunod kog bangon. Mogawas na unta ko sa lawak dihang akong namatngonan nga wala pa diay ko makasul-ob og sinina human sa lovemaking namo ni Dirk. Midali kog balik sa nahimutangan sa kama aron mag-ilis. Diriyot ko malimot sa pagpamanti.

Migawas dayon ko sa lawak human makailis. Gisundan nako si Dirk nga nakakanaog na sa silong. Naabtan ko siya nga nakigsulti ni Ingko Honorio.

“U-unsay nahitabo, Dirk?” Nangutana dayon ko sa akong pagduol sa ilang nahimutangan. “Unsa kadtong lagubo nga atong nabati?”

“Nagpakita kanako ang tagulilong, Inday Ingrid,” si Ingko Honorio maoy mitubag.

“U-unsa?” Nanglimbawot ang akong balhibo samtang namulong.

“Mao kana,” sa tambalan pa. “Gusto unta siyang motugaw sa inyong pagkatulog. Apan gisanta ko siya. Gilatos ko siya sa dala kong ikog sa pagi.”

“Dili gyud diay mi lung-an nianang maong tagulilong, Ingko?” Gikan ni Dirk.

“Mao kana ang iyang tumong kun way makasanta kaniya,” matud sa tambalan. “Nasuko man god siya pag-ayo nga giputol ang kahoy nga iyang gipuy-an.”

“Tabangi mi, Ingko,” matud ko, “aron di na mi samokon sa maong tagulilong.’

“Ayaw kamo kabalaka,” giingnan mi sa tambalan. “Kun makompleto na ninyo ang tanang mga kinahanglanon, hinginlan ko dayon ang maong tagulilong ugmang adlawa.”

Dihang nabalik na sa normal ang sitwasyon, mibalik na mi si Dirk sa among kuwarto sa taas. Nahibilin si Ingko Honorio sa may sala. Naghigda siya sa sofa bed. Gidulog niya ang ikog sa pagi nga maoy gigamit niyang sungkod kun maglakaw.

Mihigda dayon si Dirk. Apan ako naglingkod sa ngilit sa kama ug naghinuktok. May kahasol nga nanumbalay sa akong hunahuna. Unya gibitad kog hinay ni Dirk ug gipahigda. Dihang nakahigda na ko, abtik siyang mipaibabaw ug giukoban paghalok ang akong mga ngabil. Hangol ug tugob sa kainit ang iyang hinagkan. Misaka dayon ang level sa akong libido. -- Sumpayan pa