Ang gilaraw ni Greg
Alas singko y medya sa buntag. "Good morning! Puede ko mokuyog nimo kun asa ka mag-jogging?" ni Atty. Greg Conde sa iyang kasugat nga tsik. Nagpahiyom siyang namulong. Seksi. Batan-on. Maanyag. Begot og lawas. Puti og pamanit. Mestisahon. Angayan ug madanihon kaayo siya sa iyang gisul-ob nga pulang short pants ug lalag nga T-shirt.
"Si attorney, baya. Nganong dili?" paraygon ug mapahiyomong tubag sa tsik. Niurong sila tungod sa skywalk sa Talamban diin kasagaran maoy finish line sa pag-jogging sa abogado.
"Kaila diay ka nako?" ni Greg.
"Kinsa bay di kaila nimo? Nga sikat ka mang abogado. Di campanilla og god ka. Naa kas mantalaan og TV hapit tanang higayon," sa tsik. Nilupa ang atay ni Greg. Ug may gilaraw siya.
Ikaupat na ni nilang sugat sa dalan.
Niandar ang pagka-playboy ni Greg. Naglaraw siya nga sa sunod sugat nila, iya na gyung kuyogan og jogging ang tsik. Iyang ilailahon, amigahon ug sud-on. Paanaron. Sama sa manok nga anaron og hapuhap ug patuka. Unya pitlokon pag-abot sa tukmang panahon.
"Maayo ning kaadlawon mo-check-in og motel. Di magduda akong misis. Dismulawo man lang nga mag-jogging ko!" sa hilom niyang hunahuna.
Naa sa Upper Canduman magpuyo si Greg. Tua iyang opisina sa Manto Arcade sa sentro gyud sa Mandaue. Iyang misis nga si
Bisag di maayog hitsura si Greg, nagtuo siyang lakas siyag sex appeal. Kasagaran ibundak man dayon niya iyang titulo nga "Attorney Conde" aron maiknat ang kilay sa iyang gikahimamat nga tsik. Naas iyang hunahuna nga bisag di siya guwapo, tagdon siyas tsik kay abogado, bagag pitaka. Makursunada dayon ang tsik nga makigsandurot niya.
Nagtupad dayon silag jogging padulong sa Tintay, terminal sa mga dyip sa Talamban. Nisaylo pa sila didto. Niabot na sila sa merkado sa Canduman. Dayon miliko na ngadto sa dalan padulong sa Tingob.
"Mag-hike nalang una ta. Di na nako kaya. Kutas na kaayo!" ni Greg nga nag-abot ang gininhawa sa kakutas.
"Okay lang," sa tsik.
Singkwenta y dos na edad ni Greg. May mga sakit na siya nga dayabitis, artraytis ug hayblad. Gitambagan siyas doctor nga gawas sa iyang pagdiyeta, kinahanglang magpasingot gyud siya. Busa iyang gituman.
"Unsa man diay rota nimo sa pag-jogging?" sukot ni Greg.
"Naa man among balay sa Tingub. Sugod didto, jogging ko ngadto sa Casuntingan, Cabancalan, Talamban, Canduman dayon balik sa Tingub," sa tsik nga wa gyud kutasi.
"Balig napulo ka kilometro man nang rotaha," ni Greg. Naghinay’g lakaw.
"Kapin kon kulang," sa dalaga.
"Kaila diay ka ni Judge Regis? Taga-Tingub man siya," ni Greg.
"O" sa dalaga.
"Bilib hinuon ko anang huwesa. Istrikto siya apan naas lugar. Insakto iyang pagka-istriko. Dili pareha sa uban nga magpaistrikto-istrikto aron ingnong brayit. Unya ang tuyo diay, aron lang ang mga abogado o kliyente moduol niya aron mohangyo. Naay daghang korap nga huwes nga ingon ana ang modus," ni Greg. Nipahiyom lang ang tsik.
Hangtud niurong ang tsik tungod sa berdeng gate. Sa walang poste sa gate, may gibitay nga karatulang karaan nga mabasa "Dante Regis, Attorney-at-law".
"Dinhi na lang ko kutob, attorney" sa tsik.
"Nia diay ka puyo sa ilang judge?" ni Greg.
"Ako bitaw to si Shirley. Ang dad-on-dad-on ni papa sa husgado sa gamay pa," niya pa.
"Unsa god diay! Kadali ra gyud diay sa panahon. Nikilab man lang," ni Greg. Nahinumdom siya sa batang gamay nga samtang wa pay bista, maglingkodlingkod sa lingkuranan sa huwes. Napurnada ang iyang gilaraw.
"Di lang ka modayon una"? Manginom tag kape," ni Shirley.
"Ha? Ah! Eh, Nagteks na akong misis nga mamahaw na mi," pamakak ni Greg nga nihulbot sa iyang selpon gikan sa tuong bulsa sa short pants. Imbis nga nauga na iyang singot, gipaningot siyag balik. (Kataposan)
- Latest
- Trending
