“Incubus”

(Gula 24)

Gitilok namo ni Dirk ang nahibiling mga takna sa kaadlawon. Wala na mi mangatulog og balik. Human sa una namong lovemaking session, namahulay lang mig kadiyot. Dihang nakatigom nag igong kusog, mi-score pag-usab si Dirk. In the mood for love ko maong mainiton kong nakigtigi kang Dirk pagtagay sa lawasnong kalipay.

Nakadaginot gyud mig tulo ka round hangtod sa kabuntagon. Natagbaw ko sa among gibuhat. Tungod lagi kay hanas man siyang molipay og babaye, wala koy ikasaway sa iyang performance sa ibabaw sa kama. Superyor ang performance ni Dirk.

Mibangon ko og migawas sa kuwarto. Gipasagdan ko lang si Dirk nga nagbuy-od sa kama. Nakatulog siya’g balik human sa ikatulo namong lovemaking session.

Miadto ko sa kosina aron maghikay sa among pamahaw. Una nakong gitak-ang ang kan-on nga giluto pinaagi sa rice cooker. Gisunod nakog luto ang sud-an. Madasigon kaayo kong miasikaso sa buntagon kong mga bulohaton sa balay.

Hapit na ko makaluto dihang nahiabot si Dirk sa kosina. Samtang nagtalikod ko niya ug may gikurikuri sa may banggera, iya kong gigakos.

“Gigutom ka na?” Gipangutana ko siya.

“Maagwanta pa,” maoy iyang tubag.

“Sakto-sakto gyud ang imong pagmata. Hapit na maluto ang gihikay kong mga pagkaon.”

“Mao ba? Humot ra ba kaayo nang sud-an nga imong giluto, da.”

“Imo nang paborito.”

Samtang naghulat nga maluto ang tanan kong gihikay, si Dirk nananghid nga moadto sa sala aron motan-aw sa buntagong tulomanon sa telebisyon. Giyango ko lang ang akong pagsanong kay may gibuhat man ko sa may banggera. Tawgon ko lang unya si Dirk kun mamahaw na kami. Maong miadto siya sa sala.

Apan wala madugay, nahibalik si Dirk sa kosina. Nagtapion ang tuo niyang kamot sa iyang agtang nga nagkadugo. – Sumpayan pa