Bugti sa kamatinud-anon

Masulob-on ang bata nga si Anthony karong buntaga. Naglamugdong ang iyang panagway ug wala gayoy bisan diyotay nalang kangaya nga makita.

Karong adlawa mao ang gisaad kanila sa ilang maestra sa Grade 1 nga si Mrs. Carina Cunado nga tug-anan sila kinsa ang mga honor pupils sa ilang klase. Ugma mao na ang ilang commencement exercises pagtapos sa tuig tingtungha."

Ang nakapasubo ni Anthony mao nga naseguro na niya nga dili siya ang first honor. Lupig siya kaayo ni Philip sa klase. Bright  si Philip kay kaniya. Sa mga pasulit nga ihatag sa ilang maestra, si Philip kanunay ang mangharos. Bisan giunsa niyag paningkamot pagtuon og maayo aron hilabwan niya si Philip, apan wala gihapon siya kalupig niini.

Nagtamod usab siya sa pulong sa ilang maestra nga dili gayod manglimbong sa klase, dili mangodigo o mangopya panahon sa eksaminasyon. Bahala nag dili niya malupigan si Philip, dili gayod siya mangopya.

Laing nakapasubo kang Anthony karon mao ang paghunahuna nga dili siya makadawat sa regalo nga gisaad sa iyang Mama Linda kaniya.

"Kun ma-first honor gani ka Dong," nagkanayon kadto ang iyang Mama Linda, "palitan ko ikaw og bag-ong karsones, sinina ug sapatos."

Nakailis na si Anthony ug andam na sa pagtungha dihang misulod sa iyang lawak si Mama Linda niya.

"Nakamatikod kami si Papa nimo, Dong, nga morag may problema ka," matud ni Linda. "Unsa bay nakahasol sa imong hunahuna?"

"W-wa man, Ma," tubag ni Anthony dayong punit sa bag nga gisudlan sa iyang mga gamit sa eskuylahan. "Adto nako sa eskuylahan, Ma."

"Magkuyog lang ta," matud sa inahan. "Moadto man sab ko sa lungsod ug malabyan man ang inyong tunghaan."

Sa eskuylahan walay timik si Anthony sa iyang gilingkoran. Samtang si Philip, morag gitil-asan, wala mahimutang sa iyang gilingkoran. Daw sa excited kaayo kini. Mitindog na si Mrs. Carina Cunado ug namulong atubangan sa klase aron pagpahibalo sa napili niyang honor pupils.

Miduko si Anthony. Ug daw gipugngan niya ang iyang pagginhawa dihang mipadayon pagsulti ang maestra.

"Ang mga honor pupils mao kining mosunod: Vashti Galos, fifth honor; Jimmy Ayag, fourth honor; Jenalyn Pequit, third honor; Philip Renos, second honor; Anthony Cruz, first honor."

Makabungog nga palakpakan sa kabataan ug ang sibaw sa sininggitay. Apan naglibog sila nga si Anthony maoy first honor. Lakip si Anthony wala magdahom nga mao kadtoy mahitabo ingon man si Philip.

"Ma'am," mitindog si Philip, "nganong si Anthony man ang first honor nga lupig man kaayo siya nako?"

Si Anthony wala lang magtingog. Wala siya makasabot sa iyang gibati.

"That's a very good question, Philip," matud sa maestra. "Si Anthony maoy akong gipili nga first honor tungod kay siya ang angay. Matinud-anon siya. He will not cheat during our tests. Dili sama nimo nga kusog mangodigo. Taas tuod kag score apan mubo ang imong grado kay sa kang Anthony kay dako ang deduction nga akong gipahamtang kanimo sa akong class record tungod kay kanunay ko ikaw'ng mapanid-an nga mangodigo."

Sa nadungog ni Anthony, daw misugwak ang kalipay sa iyang dughan. Unya nahunahuna niya ang bag-ong karsones, sinina ug sapatos nga gisaad sa iyang Mama Linda kaniya. (Kataposan)