Niadtong unang panahon, may usa ka hari nga ginganlan og David. Usa lang siya ka magbalantay sa panon sa mga karnero sa iyang Amahan. Apan sa dihang napatay ni David si Goliath, ang gikahadlokan nilang pangulo sa mga sundalo nga kaaway sa Israel, nahimong hari si David puli kang Saul.
Usa niana ka hapon samtang nagsuroy-suroy si David sa atop (roof deck) sa iyang palasyo, nakita niya ang usa ka matahum babaye nga naligo.
"Susiha ninyo kun kinsa kining matahum nga babaye," sugo ni David.
Sa pagbalik sa iyang gisugo, "Si Bathseba ang ngalan sa maong babaye. Asawa siya ni Uria, usa sa imong mga kapitan sa kasundalohan nga atua sa pangubatan," tubag sa sinugo.
"Dad-a ninyo siya dinhi."
Nianang gabhiona, si Bathseba ang gidulog ni David sa iyang pagtulog. Pagka-buntag iya kining gipapauli ug nagsugo siya nga ipatawag si Uria ang bana ni Bathseba. Sa pag-abot ni Uria gikan sa panggubatan gitunulan kini ni David og sulat.
"Ihatag kang Heneral Joab kining sulat," pulong ni David. Ang giingon sa sulat. "Ibutang si Uria sa pinakainit nga panag-way aron mapatay."
Busa gibutang ni Joab si Uria sa pinaka-init nga away ug didto napatay si Uria. Pagkahibalo ni David nga patay na si Uria, iyang gikuha si Bathseba aron mahimong usa sa iyang mga asawa. Nanganak si Bathseba og lalaki nga ginganlan nila og Solomon. Sa dihang nahimong hari si Solomon, nagpakita ang Dios kaniya pinaagi sa damgo ug gipapangayo siya sa iyang gusto.
Apan ang gipangayo ni Solomon mao lang nga hatagan siya og kaalam aron madumalahan ang lungsod sa Israel. Gikahimuot kini sa Dios, busa matud sa Dios kaniya, "Tungod kay wala ka mangayo alang sa imong kaugalingon, ihatag ko kanimo ang imong gipangayo bisan ang wala nimo pangayoa sama sa bahandi ug mga kinaadman ihatag ko kanimo."
Pagmata ni Solomon nakita niya nga kini usa lamang ka damgo apan nagtuo siya nga himuon sa Dios ang gisaad niini. Sukad niadto nahimong manggi-alamon si Solomon ug nakabaton siya og mga bahandi. Ang iyang palasyo naputos sa bulawan nga gidayandayan sa mga mahalong bato sama sa diamante, rubi, topasio ug uban pa.
Bisan ang iyang mga plato, baso ug mga kopa, lunsay bulawan. Naila ang iyang kinaadman sa laing mga gingharian sa Afrika. Bisan ang mga sinultihan sa mga hulmigas iyang hisabtan. Usa sa mga miduaw kaniya aron sutaon ang iyang kinaadman ug bahandi mao ang Reyna sa Sheba nga namulong, "Katunga lang ang ilang gibalita kanako mahitungod nimo ug wala ko mahibaloi ang lain nga katunga kun wala pa nako susiha mismo."
Sa dihang namatay si Solomon, nagbilin siya og 300 ka asawang prinsesa ug 700 ka mga puyopuyo (concubine). Walay nahimong hari sa Israel nga nauna kaniya ug sa mga misunod pa kaniya nga molabaw pa kaniya sa bisan unsang butang, kinaadman ug bahandi. (Kataposan)
