Ang sikat nga mag-aawit

Si Jeffrey gikasinahan sa iyang mga higala. Alang kanila si Jeffrey mao ang labing palaran nga linalang sa ilang dapit. Kinsa may di masina nga gawas sa iyang ka ambongan naghupot pa man gayod siya og talento sa pagka nindot og tingog ug sa talento sa pagka maayong mokanta.

Gawas niini, bugtong pa gyud siyang anak sa usa ka asyendero sa ilang dapit.

Gumikan sa iyang pagka maayong moawit, molampos gayod ang tanang konsyerto nga iyang ipahigayon sa nagkalainlaing kanasoran sa tibuok kalibutan.

Hangtod nga miabot ang panahon nga hilabihan na ang iyang kabantogan ug kakwartahan. Tungod sa daghan niyang bahandi nakapatukod siya og mansyon, nakapalit siya og daghang mahalong mga sakyanan, lakip na niini ang usa ka limousine ug usa ka Rolls Royce.

Tungod sa iyang nagtipun-og nga kwarta niabot ang panahon nga anha siya makapamahaw sa usa ka nasud, adto maniudto sa laing nasud ug adto manihapon sa lain pa gyud nga nasud.

Bisan kinsa lang ang babaye nga iyang ikauban sa kama. Aduna siyay nakapuyo nga usa ka artista sa puting tabil nga usa ka Bombay.

May mga kapuyo siya nga usa ka international model, flight stewardess, fashion designer, Miss USA ug uban pa.

Siya ang gigukod sa kaliwat ni Eba ug dili siya ang mogukod kanila. Daghan siyang babaye nga gipahilak nga nibakho kay wa niya panumbalinga.

Pwerte na usab siyang makainom sa  mga imported nga wine sama sa Chivas Regal, Swing ug Johnny Walker.

Apan luyo sa daghang mga babaye nga iyang gikauban sa pagdimdim sa matam-is nga dugos sa himaya, luyo sa mga nindot nga dapit nga iyang gisuroy, luyo sa iyang mga natilawan, luyo sa mga mahalong bino nga iyang nadimdim, iyang gibati nga adunay nakuwang kaniya.

Ug kining butang nga nakapakulang kaniya nakahatag kaniya og kaguol. Hangtod nga nakahunahuna na lang siya sa paghikog. Apan sa wala pa kini niya buhata misuroy una siya sa iyang dapit. Samtang siya nagsuroy nakita niya ang mga buang, ug mga libudsoroy nga mga bata nga niwang na kaayo gumikan sa pagkawalay kaon.

Gumikan sa kalooy, ang mga buang ug libud suroy nga mga bata iyang giligo. Pagkahuman iyang gipalitan og mga bag-ong sapot unya iyang gipalitan og lamiang potahe sa pagkaon. Sa unang higayon gibati ni Jeffrey ang lahi nga kalipay sa iyang dughan. Ug nawala na ang kahaw-ang nga iyang gibati. Ug sa unang higayon, mipahiyom siya samtang nagsud-ong sa mga buang ug mga bata nga nagkaon. Napamalandong ni Jeffrey nga ang hingpit nga kalipay dili diay maangkon sa tawo pinaagi sa pagtagbaw sa iyang kaugalingon. Kun dili ang pakig ambit sa imong dakong grasya nga nadawat ngadto sa imong kabos nga mga kaigsoonan. (Kataposan)