Dula sa pangandoy ug panimalos

Kalit ka lang gikulbaan, Jamaica. Ang anino sa kalisang inanay nga mikamang sa imong nawong. Ang panaghimamat ninyo ni Zen nga gitawag og Big Boss ni Yukiko daw mihingilin sa tanan mong kaisog. Misantop sa imong hunahuna nga usa ka taas ug tinamod nga lider sa Yakuza gang ang imong gikaatubang.

"Big Boss wants to be your friend, Jamaica," nagngislit ang nawong ni Yukiko nga namulong. "I told him you are a good girl."

Midungo ka agig paghatag og pagtahod ngadto sa Big Boss ni Yukiko. Misantop sa imong hunahuna nga angay kang mag-amping nga dili makahimog sayop nga lihok atubangan ni Zen maong nahisama ka sa usa ka buotang karnero. Nasayod ka nga walay kapuslanan kun magsinuplada ug magminaldita ka. Basin dili ka na unya makapauli nga buhi sa Pilipinas kun mag-inisog ka atubangan sa usa ka lider sa Yakuza.

"Big Boss wants  you to  go with him," nagkanayon si Yukiko.

Mitan-aw si Zen kanimo. Nagpahiyom kini apan imong nasabot nga gusto niining sutaon kun unsay imong reaksiyon sa gisulti ni Yukiko.

Kalit lang namugnaw ang tibuok mong kalawasan. Nakasabot ka sa gisulti ni Yukiko. Ug nasayod ka sa posibleng mahitabo nimo kun mokuyog ka kang Zen.

Sa makadiyot gipasuroy mo ang imong panan-aw sa palibot. Daw nangita kag tawo nga posibleng makatabang niini karong apiki mong kahimtang. Apan wala kay nakita nga kapangayoan og tabang. Ang tanang mga tawo sa inyong palibot wala gani motan-aw kaninyo. Daw naglikay gani sila bisan sa pagpasiplat na lang kaninyo.

Gumikan sa gibati mong kahadlok, napugos ka pagtuman sa gisulti ni Yukiko. Mikuyog ka kang Zen bisan supak kini sa imong kabubut-on. Misugot ka nga gamiton ni Zen ang imong lawas sa pagtagbaw sa iyang kahangol sa lawasnong kalipay.

Sulod sa mabugnaw'ng lawak nagtagbaw si Zen pagpahimulos sa imong pagka babaye. Gipasagdan mo siya sa iyang gibuhat, dili tungod kay nakagusto ka kaniya, kondili tungod sa imong kahadlok nga masuko siya kun magpakita kag pagsupak sa iyang gibuhat. Mora kag gi-torture samtang nagtagbaw si Zen pagdimdim sa matam-is nga dugos sa imong pagka babaye. (Sumpayan pa)